Быйыл март айында киши колдуу болгон
Камила Дүйшөбаеванын өлүмүнө айрым белгилүү адамдардын катышы болушу мүмкүндүгү айтылууда. Алар башкы прокурор
Аида Салянованын аталаш тууганы деп айтылып жаткан
Калый Салянов жана "Мекен шейиттери" уюмунун мурунку жетекчиси
Осунбек Жамансариев. Фактыга тийиштүү жаңы жагдайлар боюнча "Азаттык" төмөнкүлөрдү жарыялады:
Камила Дүйшөбаеванын атасы Эшмамбет Дүйшөбаев бул иш боюнча көрсөтмө бергендердин арасында күмөн жараткан күбөлөр бар экенин биринчи жолу жарыялады:
- Мага тергөөдөгү күбөлөрдүн көрсөтмөлөрүн көргөзүшкөн. Анда кызымдын курбулары, туугандары, тааныштары жана бирге окуган тайпалаштары сыяктуу бир катар адамдар көрсөтмө беришкен экен. Анан бул иш боюнча көрсөтмө бергендердин арасында башкы прокурор Аида Салянованын аталаш тууганы Калый Салянов менен “Мекен шейиттери” уюмунун жактоочусу болуп жүргөн Осунбек Жамансариев жүрөт. Менимче, бул экөө дос болсо керек. Буларды сурагандын себеби, мына ошол Калый дегени менин кызым менен тааныш болгондуктан, 9-марттын түнүндө жеткизген экен. Бир Кудай билет эми. Мен кызымдын өлүмүнө Калый Салянов күнөөлүү деп айта албайм. Бирок тергөөдө башка бир шектүү адамдар боюнча жыйынтык жок.
Маркумдун эжеси Айжан Дүйшөбаева каргашалуу окуядан бир күн мурун Камила менен анын курдашын жашы бир топко барып калган адам автоунаа менен жеткирип койгон жагдай көбүрөөк шек жаратып жатканына токтолду:
- 9-марттын түнүндө Камила курбусу менен Чүй-Гоголь көчөсүндө жайгашкан “Демократ” деген кафеде отурган экен. Бул боюнча кийин курбусу бизге айтып берди. Калый деген кишиге “бизди жеткирип коюңуз” деп чалышыптыр. Анан ал келип, Камиланын курбусун 7-кичи районго ташташкан. Калый деген киши "Камила “40x40” деген клубга жеткенде ошол жерге калтырып коюшумду суранган" деп көрсөтмө бериптир. Бирок ал аралыкта эмне окуя болгону белгисиз. Анан ошол түнү Камила такси кармап алып үйгө келген экен. Биз анда уктап жатканбыз. Өзү үйдү ачып, бөлмөсүнө кирип кетиптир. Ошондо алдынан тосуп алган жээнибиз Камиланын маанайы жок болгонун айтып берди. Эртең менен да ал бир топко чейин терезени карап ойлонуп отуруп, анан үйдөн чыгып кетиптир. Биз ага анча деле маани берген эмеспиз. Ошол чыгып кеткен боюнча ал кайра үйгө кайрылып келбеди.
Күбөлөрдүн көрсөтмөсүндө жогорку даражалуу кызмат адамынын тууганы деп айтылып жаткан күбөлөрдүн бири, 53 жаштагы жеке ишкер Калыбек (Калый) аттуу адам өзүнүн тергөөдөгү көрсөтмөсү боюнча буларды айтып берди:
- 9-март күнү кечинде жолдош балдар менен мончодо отурганбыз. Анан түнкү ондордо мага Камила "Калыбек байке, карыз болуп калдык эле, кафеден коё бербей жатат, бир миң сом бересизби?" деп чалып калды. “Мен балдар менен отурам, мүмкүнчүлүгүм жок, бара албайм” десем болбой, жети-сегиз жолу чалды. Жаш баланын көңүлүн кыя албай, Нарындын экс-губернатору болгон досум экөөбүз алар отурган кафеге келдик. Анан акчаны берип кетип бара жатсак, “бизди дагы таштай кетиңиздерчи” деп калды. Анан анын жанындагы курдашын үйүнө таштап келе жатсак, Камила "40x40" деген кафенин жанына таштап коюңузчу" деди. Аны ошол жерге калтырып, досум экөөбүз үйгө кеткенбиз. Досумду үйдө коноктоп, 7-Апрель окуясынын Баатырлары үйгө келип, алар менен чогуу сүйлөшүп отуруп, эртеси эртең менен, тактап айтканда, 10-март күнү Осунбек Жамансариев экөөбүз Жумгалга кеткенбиз. Биздин бул окуя болгон күнү Бишкекте болбогонубузду тастыктаган далилдер менен күбөлөрдүн көрсөтмөлөрүн тергөө изилдеп чыккан. Белгилей кетчү жагдай, кыз жоголгондон кийин туугандары курбусу аркылуу мага чыгышкан. Ушундан кийин мен аларга жолугуп, Камиланы чогуу издегенбиз.
Осунбек Жамансариев өзүнүн ал окуяга түз же кыйыр жагдайда катышы жок экенин билдирген.
Эскерте кетсек, быйыл 10-мартта 19 жаштагы студент Камила Дүйшөбаева Бишкектин Достук кичи районундагы үйүнөн эртең менен чыгып, ошол боюнча кайрылып келген эмес. Туура бир жумадан соң, 17-мартта анын сөөгү Байтик айылынын чекесинен табылган.
