Ош шаарында электрондук китепкана жөнүндө түшүнүк берүү максатында жыйын өтөт

Ош шаарында эртең, 16-декабрда электрондук китепкана жөнүндө түшүнүк берүү максатында жыйын өтөт. Бул тууралуу бүгүн, 15-декабрда Ош шаардык билим берүү башкармалыгынын басма сөз кызматынан билдиришти.

Маалыматка ылайык, иш-чара Кыргызстандын 40 жылдыгы атындагы №16-мектеп-гимназияда "Байлыктын баары китепканада" деген аталышта өтөт. Иш-чаранын алкагында электрондук китепкана жөнүндө түшүнүк берүү максатында атайын даярдалган слайд көрсөтүлмөкчү. Андан сырткары залкар жазуучу Чыңгыз Айтматовдун туулган күнүнө карата адабий-музыкалык кече уюштурулуп, китеп окуу боюнча сынак өтөт. Ошондой эле "Азыркы коомдогу китептин ролу" темасына арналган талкуу уюштурулат.

Иш-чарага Ош шаардык билим берүү башкармалыгынын жетекчиси Куштарбек Кимсанов, аталган башкармалыктын жетектөөчү адиси Дилбар Самидинова жана жергиликтүү мектептердеги китепканалардын жетекчилери катышат.

Автор: Мальвина Уметбекова