Өкмөт ЮНИСЕФ менен биргеликте балдарга карата зомбулук көрсөтүүнүн алдын алуу боюнча маалыматтык кампанияны ишке киргизет

Кыргыз Республикасынын Өкмөтү ЮНИСЕФ менен биргеликте “Мен зомбулукка каршымын!” аттуу балдарга карата зомбулук көрсөтүүнүн жана катаал мамилелердин алдын алуу боюнча маалыматтык кампанияны баштоодо. Бул тууралуу өкмөттүн басма сөз кызматы 27-январда билдирди.

"Аталган маалыматтык кампания балдарга карата зомбулук көрсөтүү окуяларынын көбөйүшүнө карата жооп катары саналат. КРнын Саламаттык сактоо министрлигинин өткөн жылдын 9 айы үчүн маалыматына ылайык, республикада жалпысынан 92 зомбулук катталган, анын 42 пайызы балдарга карата жасалган",- деп айтылат маалыматта.

2014-жылы ЮНИСЕФ Улуттук статистикалык комитет менен биргеликте иликтөө жүргүзүп, 1 жаштан 14 жашка чейинки балдардын 57 пайыздан ашууну ата-энелер тараптан психологиялык агрессияга жана физикалык жазалоого дуушар болорун аныктаган.

Маалыматтык кампания алкагында төмөнкүлөр даярдалат:

• социалдык жарнама (постерлер, инфографика);

• 3-5 жашар балдар үчүн 5 сериялык анимациялык программалар, аларды көргөндөн кийин балдар зомбулуктун курмандыгы болгон учурда аткарууга зарыл болгон негизги аракеттерди атай алышат;

• балдар жана мугалимдер үчүн балдарга карата зомбулуктун негизги белгилери жана тийиштүү аракеттер тууралуу үйрөтүүчү 10 мүнөттүк окутуучу тасмалар;

• стрит-арт;

• интерактивдүү инсталляция;

• ТВ берүүлөрдү, атайын репортаждарды тартуу;

• жетекчилердин жана эксперттердин ТВ жана радиоберүүлөргө катышуусу;

• басма ММКларда интервьюлардын сериясы.

Маалыматтык кампаниянын жыйынтыгында коомчулук (балдар) эгерде адам зомбулуктун курмандыгы же күбөсү болсо, же кооптонууну сезсе эмне иш кылуу керектигин, ал эми ата-эне, мугалимдер жана коомчулук үй-бүлөдөгү зомбулуксуз ыкмалар тууралуу маалымат ала алышат.

Маалыматтык кампания Улуу Британия элчилигинин каржылык колдоосу аркылуу Кыргыз Республикасынын Өкмөтү жана ЮНИСЕФ тарабынан ишке ашырылат.

Автор: Айпери Ганыжан кызы