Ысык-Атада депутаттардын катышуусунда аялдардын коомдогу орду талкууланды

Жогорку Кеңештин депутаттары Айнуру Алтыбаева, Майрамкүл Тиленчиева, Роза Акназарова, Карамат Орозова жана Элмира Жумалиева Чүй облусунун Ысык-Ата районунун жергиликтүү кеңештеринин айым депутаттары менен жолугушту. Райондогу жергиликтүү кеңештердин айым депутаттарынын катышуусундагы бул жыйында аялдардын коомдогу орду талкууланды. Бул тууралуу ЖКнын басма сөз кызматы 28-январда билдирди.

Бүгүнкү коомдун өнүгүшүндө айымдардын орду чоң экенин баса белгилеген Жогорку Кеңештин депутаттары кесиптештерин жергиликтүү маселелерди чечүүдө жигердүү иш алып барууга чакырышты. Ошондой эле жолугушууда социалдык көйгөйлөр да айтылды. Ысык-Ата районуна караштуу Ивановка айылындагы төрөт үйүн жаап салгандан бери Кант шаарындагы төрөтканада орун жетишсиз экени, "Баатыр эне" наамын алуу үчүн тиешелүү документтерди даярдоодо энелер бир топ кыйынчылыктарга кабылып жатканы ортого салынды.

Жыйындын катышуучулары ата-энелерди балдарын караганга милдеттендирген мыйзам керектигин жана дин маселесине көңүл бурбаса, жаштар ар кандай диндерге азгырылып жатканын айтышты.

Автор: Айпери Ганыжан кызы