Бишкек-Нарын-Торугарт унаа жолунда жардыруу иштери улантылууда

Бишкек-Нарын-Торугарт унаа жолунун 313-чакырымындагы жардын бөлүкчөсүн атайылап түшүрүү иштери уюштурулуп, 19-февраль күнү саат 16:35 чамасында жардыруу жүргүзүлдү. Жардыруунун жыйынтыгында болжолдуу көлөмү 1500 метр кубду түзгөн жардын бөлүкчөсү түшүп, унаа жолду жаап калды. Учурда тазалоо иштери улантылууда. Бул тууралуу бүгүн, 20-февралда Өзгөчө кырдаалдар министрлигинен билдиришти.

Маалыматка ылайык, жол тазалоо иштерине 3 даана механикалык жүктөгүч, 1 даана экскаватор, 5 даана ХОВО өзү жүктөөчү унаа ишке тартылды. Жол тазалоо иштеринин жүрүшүнө чоң көлөмдө түшкөн таш кыйынчылыкты жаратып, тазалоо убактысы көпкө созулду.

"Топтолгон жүргүнчүлөргө түшүндүрүү иштери жүргүзүлүп, алар Оттук, Казан-Куйган айылдарында, Кара-Үңкүр аймагында уюшулган убактылуу жылынуучу жайларга жайгаштырылды. Саат 23:35 чамасында бир тараптуу жол каттамы ачылып, автоунаалар кезеги менен өткөрүлдү.

2015-жылдын 20-февраль күнү жол саат 08:00дөн 18:00гө чейин жабылып, жардын бөлүкчөсүн түшүрүү жана жол тазалоо иштери улантылат",- деп айтылат маалыматта.

Автор: Мальвина Уметбекова
Фото: ӨКМдан алынды