Жалал-Абадда студенттердин катышуусунда Ата Мекенди коргоочулардын күнү белгиленди

Бүгүн, 20-февралда Жалал-Абад мамлекеттик университетинин чоң залында 23-Февраль - Ата Мекенди коргоочулардын күнүнө карата майрамдык салтанат болуп өттү. Бул тууралуу шаардык мэриянын басма сөз кызматы билдирди.

Саамалыкка өкмөттүн Жалал-Абад облусундагы ыйгарым укуктуу өкүлчүлүгүнүн аппарат жетекчиси Н.Калмурзаев, Жалал-Абад шаарынын мэри С.Авазов, шаардык кеңештин төрагасы Н.Нышанов, ардагерлер кеңешинин төрагасы, А.Кочкоров жана ЖАМУнун ректору А.Абдыраев жана башка мекеме-ишканалардын жетекчилери, ЖАМУнун окутуучулары катышышты.

Майрамдык салтанат Кыргыз Республикасынын Мамлекеттик гимни менен башталып, оркестрдин коштоосунда Кыргыз Республикасынын Мамлекеттик туусу алынып кирди. Андан соң өкмөттүн Жалал-Абад облусундагы ыйгарым укуктуу өкүлчүлүгүнүн аппарат жетекчиси Н.Калмурзаев, Жалал-Абад шаарынын мэри С.Авазов, шаардык кеңештин депутаты Н.Нышанов 23-Февраль - Ата Мекенди коргоочулардын күнү менен куттукташты.

Шаардагы аскер кызматкерлерине Ардак грамоталар жана мекеме-ишканалардын арасындагы татыктуу кызматкерлерге баалуу белектер, акчалай сыйлыктар тапшырылды. Студенттер жана окутуучулар тарабынан атайын даярдалган концерттик программа келген коноктор үчүн тартууланды.

Автор: Айпери Ганыжан кызы