Ошто студенттер үчүн чет тилин акысыз окуу мүмкүнчүлүгү түзүлөт

Ош шаарындагы жогорку окуу жайлардын студенттери үчүн чет тили боюнча акысыз курска баруу мүмкүнчүлүгү түзүлдү. Бул тууралуу бүгүн, 24-февралда мэриянын алдындагы Жаштар комитетинен билдиришти.

Маалыматка ылайык, курстарга 24-февралдан 12-мартка чейин жазылса болот. Ага шаардагы бардык жогорку окуу жайлардын студенттери катыша алышат. Аталган курс шаардык мэрияда бир жумада 3 жолу өтүп, орус тили боюнча окутуу 4 ай, ал эми англис тили боюнча окуу курсу 3 айды түзмөкчү. Ар бир тайпада 25 студент окутулат.

Уюштуруучулар билдиришкендей, курс жаштарды колдоо жана жаштар арасында ынтымакты бекемдөө максатында өткөрүлүүдө.

Автор: Мальвина Уметбекова