Баткен облусунун прокурорунун өлүмүнө айыпталып жаткан жаран ачкачылыкты токтотту

Баткен облусунун прокурору Анарбай Мамажакыповдун өлүмүнө айыпталып жаткан Мелис Калыков 5-августтан баштап ачкачылык жарыялаган. Айыпталуучу ачкачылыкты токтотконун Улуттук коопсуздук мамлекеттик комитетинен кабарлады.

"14-августта айыпталуучу Мелис Калыков ден соолугунун начарлаганына байланыштуу ачкачылыкты токтоткондугу тууралуу арыз жазган. Ал мекеменин администрациясына эч кандай доосу жок экенин билдирген", - деп жазылат маалыматта.

Ал эми Мелис Калыковдун бир тууганы Дарийка Калыкова бул маалыматты четке какты. Анын айтымында иниси ачкачылыкты токтоткон жок.

Баткен облусунун прокурорунун өлүмүнө айыпталуучу Ош шаарындагы СИЗО-5те камакта отурат. Ал ишти карап жаткан Ош шаардык сотунун судьясын алмаштырууну талап кылган. Бирок анын өтүнүчү канааттандырылбагандыктан ачкачылык жарыялаган.

Окуянын чоо-жайына кайрылсак:

Облустук милициядан билдиришкендей, прокурор Мамажакыповдун Лексус 470 үлгүсүндөгү унаасы 2018-жылдын 17-ноябрь күнү кечинде Баткен шаарынын Т.Турмаматов көчөсүнөн табылып, унаанын сыртында канга окшогон тактар бар экендиги билинген. Издөө иштеринин натыйжасында анын жансыз денеси 18-ноябрь күнү таңкы саат 6:00 чамасында Кызыл-Жол кварталынын батыш тарабындагы Танги-Өтөк участкасы жактан табылган.

29-ноябрда маалымат жыйыны өтүп, анда Башкы прокуратуранын Тергөө башкармалыгынын башчысы кылмышка шектелип кармалган М.Калыков маркумду баш сөөккө атып өлтүргөнүн маалымдаган. Ал эми ИИМдин тергөө тобунун башчысынын орун басары Нурлан Утемисов маркум менен шектүү М.Калыковдун мушташып жатканын көргөндөр бар экенин билдирген.

Белгилүү болгондой, киши колдуу каза болгон Анарбай Мамажакыпов 1975-жылы Ош облусунун Чоң-Алай районунда туулган. Маркумдун артында 4 баласы калды. 2018-жылдын май айынан тартып Баткен облустук прокурору болуп иштеп жаткан. Ага чейин Талас шаарынын прокурору болгон. Анын сөөгү 2018-жылдын 19-ноябрында Чоң-Алай районундагы туулуп-өскөн Чак айылында жерге берилген.