Ысык-Көлдө вирус менен ооругандар толук айыкты. Аймактардагы стационарларда канча бейтап дарыланып жатат? (статистика)

6-майга карата өлкөдөгү стационарларда 245 бейтап коронавируска каршы дарыланып жатат. Анын ичинен 7 бейтаптын абалы оор. Дагы 675 адам обсервацияда жатат.

Бул күнгө карата аймактардагы стационарлардагы статистика кандай болуп жатканына кызыгып көрдүк. Маалымат Саламаттыкты сактоо министрлигинин расмий сайтындагы күн сайын жаңыланып туруучу картасынан алынды.

Бишкек жана Чүйдө жалпысынан 329 жарандан коронавирус аныкталган. Анын ичинен 164 бейтап айыгып, ооруканадан чыгарылса, дагы алтоо (Бишкекте 5, Чүйдө 1) каза болду. Калган 159 жаран дарылануусун улантып жатат.

Ош облусу жана Ош шаары боюнча жалпы 282. Анын 132си облустагы стационарларга жаткырылып, бүгүнкү күндө 117 бейтап айыкты. Дагы үчөө каза болду. Учурда 12 бейтап (Ноокат аймактык ооруканасында 1, Кара-Суудагы аймактык ооруканада 6, Өзгөндөгү аймактык ооруканада 5) стационарларда калууда.

Ош шаарында 150. Анын 122си илдеттен арылса, дагы үчөө каза болду. Стационарларда калгандар 25 (Ош шаардык клиникалык ооруканасында 16, облустар аралык биргелешкен клиникалык ооруканасында 9).

Жалал-Абад облусу боюнча жалпы 129. Бүгүнкү күндө анын 110у айыгып, 19 бейтап стационарларда калууда. (Жалал-Абад облустук клиникалык ооруканасында 1, Ала-Бука райондук аймактык ооруканасында 4, Тогуз-Тородогу дарыгерлер борборунда 3, Чаткалдагы дарыгерлер борборунда 11).

Нарында жалпы 103. Анын ичинен 83 жаран сакайып, 20 бейтап дарылануусун улантып жатат. (Нарын облустук ооруканасында 6, Жумгал райондук аймактык ооруканасында 4, Ат-Башы районундагы аймактык ооруканасында 10).

Ысык-Көлдө жалпы 10. Бүгүнкү күнгө карата бардыгы оорудан айыгып, медициналык жайдан чыгарылды.

Баткен облусунда жалпы 18. Анын 8 бейтабы айыгып, үйлөрүнө чыгарылса, 10 жаран стационарларда калууда (Кадамжай районундагы аймактык ооруканасында 6, Лейлек районундагы аймактык ооруканасында 3, Кызыл-Кыя аймактык ооруканасында 1).

Саламаттыкты сактоо министрлигинин маалыматына ылайык, стационарлар айрым аймактарда (район, айыл) түзүлгөн эмес. Бейтаптын абалы оорлошуп кетсе, шарты жакшы стационарга которулат. Мындан улам оорулуу жаран айыкканда кайсы аймактын ооруканасынан чыккан болсо, ошол аймактын статистикасына кошулуп, баланча аймактан мынча бейтап айыкты деп эсептелет.

Автор: Бактыгүл Момбекова