Өлкөдө коронавирус менен ооругандардын саны жалпы 1082ге өстү (видео, хронология)

Бүгүн, 14-май саат 10:00гө карата өлкөдөгү коронавируска байланыштуу эпидемиологиялык абал тууралуу саламаттыкты сактоо министринин орун басары Мадамин Каратаев маалымат берди.

2020-05-14 10:13:00

Суроо: 15 жашка чейинки балдар арасында коронавируска кабылгандардын саны эмнеге көп болуп жатат?

Жооп: "Балдар илдетти чоңдордон жуктуруп алып жатышат. Көбүндө илдеттин белгилери жок өтүп жатат".

2020-05-14 10:12:00

"Мен түштүк аймактагы абал менен таанышып келдим, ал жакта абал туруктуу. Биз катуу көзөмөлдөп жатабыз. 1-2 жарандан оору аныкталган учурлар болууда, алар чет өлкөдөн келгендер".

2020-05-14 10:10:00

"Кош бойлуу келиндерди төрөтканалар кабыл албай жатышкан маалымат боюнча парламентте дагы маселе көтөрүлдү. Биз курсактагы баласы чарчап калган келин тууралуу маалыматыбыз бар. Анын иши боюнча текшерүү жүргүзүлөт", - деди Каратаев.

2020-05-14 10:09:00

Өлкө боюнча стационарларда 335 бейтап дарыланып жатат, алардын ичинен 5 жаран оор абалда жандандыруу бөлүмүндө.

2020-05-14 10:07:00

"Мага азыр эле жаңы маалымат келди. Ага ылайык, Нарын облусунда дагы 15 жарандан коронавирус аныкталды", - деди министрдин орун басары.

Муну менен ооругандардын жалпы саны 1082ге өстү.

2020-05-14 10:05:00

Бир сутка ичинде өлкө боюнча 6 медициналык кызматкер коронавирус жуктуруп алганы аныкталды.
Бишкек шаары – 5;
Ош шаары – 1.

Ал эми стационарлардан 3 медицина кызматкери сакайып чыкты.

Жалпысынан республика боюнча 247 кызматкерден коронавирус аныкталып, алардын ичинен 192си стационарлардан айыгып чыккан.

2020-05-14 10:03:00

Бүгүнкү күнгө карата 23 жарандан коронавирус аныкталды.

Бишкек шаары – 14;
Чүй облусу - 4, алардын ичинен 2 жаран Соль-Илецктен келгендер;
Ош шаары - 1;
Жалал-Абад облусу - 4;

Жалпы 1067.

2020-05-14 10:02:00

Сутка ичинде 9 бейтап ооруканадан чыгарылды.

Бишкек шаары – 5;
Ош шаары - 1;
Ош облусу - 2;
Нарын облусу - 1.

Жалпы 735.

Автор: Бактыгүл Момбекова