ЖЭБ соту. Сапар Исаков, Осмонбек Артыкбаев, Салайдин Авазов 12-августка чейин камакта калышты

Бүгүн, 6-июнда Бишкек шаарынын Свердлов райондук сотунда Жылуулук электр борборун жаңылоо боюнча сот өттү. Анда мурдагы премьер-министр Сапар Исаковдун, мурдагы энергетика министри жана экс-депутат Осмонбек Артыкбаевдин жана "Электр станциялар" ишканасынын мурдагы башчысы Салайдин Авазовдун адвокаттары баш коргоо чараларын өзгөртүүнү өтүнүштү.

"Соттолуучулардын камакта отурганына бир жылдан ашты. Бул мыйзамга каршы келет жана алардын укугун бузат. Буга байланыштуу Конституциялык палатага тиешелүү арыз менен кайрылса болот. Кылмыш-процессуалдык кодекске ылайык, бул арыз каралып жатканда кылмыш иши убактылуу токтотулуп, камактагы кылмышка шектүүлөр үй камагына чыгарылат же аларга эч жакка чыкпоо боюнча баш коргоо чарасы каралат", - дешти адвокаттар.

Сот бул өтүнүчтү канааттандырган жок. Соттолуучулар 12-августка чейин камакта кала турган болушту.

Окуянын чоо-жайына кайрылсак:

Былтыр, 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Кытайдан алган 386 миллион доллар менен жаңыланган ЖЭБге карата сын-пикирлер күчөгөн. Бул факт боюнча кылмыш иши козголуп, тергөөнүн жүрүшүндө бир топ жооптуу кызматкерлер кармалган. Кийин КСДП бул боюнча билдирүү таратып, өндүрүштүк кырсык Бишкек ЖЭБинин жаңыланган бөлүгүндө эмес, эски бөлүгүнөн чыкканын белгилеген. Анда: "1961-жылы пайдаланууга берилген ЖЭБди реконструкциялоо шаарды кыйроодон аман алып калды. Мына ошол кыйроонун алдын алгандар бүгүн камакта отурушат", - деп жазылган.

Андан кийин Жогорку Кеңеш ЖЭБдеги аварияга байланыштуу өкмөттүн 2017-2018-жылдардагы күз-кыш мезгилдерге даярдыгын "жетишерлик эмес" деп таап, күнөөлүүлөрдү жоопко тартуу боюнча токтомду караган.

Бишкек ЖЭБин жаңылоодо "коррупция" беренеси менен айыпталып жаткандар мурунку премьер-министрлер Жантөрө Сатыбалдиев, Сапар Исаков, депутат Осмонбек Артыкбаев, Улуттук энергохолдингдин мурунку директору Айбек Калиев, "Электр станциялары" ишканасынын мурунку жетекчиси Салайдин Авазов, "Электр станциялары" ишканасынын башчысынын мурдагы орун басары Жолдошбек Назаров, Бишкек жылуулук электр борборун модернизациялоону башкаруу боюнча топтун мурдагы аткаруучу директору Темирлан Бримкулов жана мурдагы каржы министри Ольга Лаврова.