Бишкек шаардык соту бүгүн, 5-июлда камактагы экс-башкы прокурор жана мурдагы депутат Аида Салянованын баш коргоо чарасын карап, аны абакта калтырды. Бул тууралуу анын жактоочусу Рабига Садыкова билдирди.
Маалыматка ылайык, сотко Аида Салянова өзү алынып келген жок.
"Аида Саляновага кечээ жолуккам, анын ден соолугу начарлап жатат, кээде дем ала албай да кыйналып жатыптыр", - деди жактоочу.
Ошондой эле жактоочу Аида Салянованын тарапташтары жана жакындары соттун чечимине нааразы болуп, парламенттин алдына барышканын да кошумчалады.
21-июнда Биринчи Май райондук соту кримтөбөл Азиз Батукаевдин бошотулушу боюнча экс-прокурор Аида Салянованы 26-августка чейин камакта калтыруу чечимин чыгарган. Ал ушул жылдын 3-июнунда кармалган.