Бүгүнкү күнгө карата 10 медицина кызматкери айыгып, ооруканадан чыгышты (видео, хронология)

Бүгүн, 20-апрель саат 10:00гө карата коронавируска байланыштуу өлкөдөгү кырдаал боюнча Саламаттыкты сактоо министрлиги жаңыланган маалыматтар менен тааныштырды. Өкмөт үйүндө өтүп жаткан онлайн маалымат жыйынга министрдин орун басары Нурболот Үсөнбаев келди.

2020-04-20 10:18:00

"Айыккандардын арасында 10дон ашуун медицина кызматкерлери дагы бар. Алар акырындык менен ишине кайтышат", - деди Нурболот Үсөнбаев.

2020-04-20 10:17:00

Суроо: Эпидемиологиялык абалга байланыштуу карантин май айынын ортосуна чейин узартылышы мүмкүнбү?

Жооп: Азырынча бул суроого жооп берүүгө эрте. Аткени биз коронавирустун туу чокусуна жете элекпиз.

2020-04-20 10:16:00

Жеке менчик лабораторияда коронавируска тест тапшыруу 2 миң сомдон жогору болот. Бул тууралуу бүгүн, 20-апрелде саламаттыкты сактоо министринин орун басары маалымат жыйында билдирди.

2020-04-20 10:15:00

Министрдин орун басары: "Өлкө боюнча тоңдурулган үлгүлөр жок. Баарынын жыйынтыгы чыккан".

2020-04-20 10:14:00

Медицина кызматкерлерине кошумча каражат төлөп берүү боюнча маселе каралып жатат.

2020-04-20 10:11:00

Нурболот Үсөнбаев: "Польшадан келген дарыгерлер тобу бүгүн, 20-апрелде саат 09:00дөн баштап Республикалык клиникалык жугуштуу ооруканага барышты. Алар бейтаптарды дарылашат. 27-апрелден кийин түштүк аймакка барышат.

Ал эми Кытайдан келе турган дарыгерлер лабораториялык изилдөөлөрдү карашып, биздин дарыгерлерди аралыктан окутат".

2020-04-20 10:08:00

20-апрелге карата коронавирус жуктуруп алганы аныкталган 14 кишинин ичинен 6 медицина кызматкери бар. Алардын ичинен: Жалал-Абад облусунда – 3, Ош шаарында – 1, Нарын облусунда – 1, Бишкек шаарында – 1.

Жалпысынан республика боюнча коронавирус диагнозу менен медициналык кызматкерлер арасында – 140 жаран катталды.

2020-04-20 10:07:00

Коронавирус аныкталган бейтаптардын ичинен 311 – аял киши, 257 – эркек киши.

2020-04-20 10:06:00

Стационарларда жаткан бейтаптардын ичинен 16 жарандын абалы оор бойдон калууда.

2020-04-20 10:04:00

Сутка ичинде өлкө боюнча 68 бейтап илдеттен арылып, ооруканадан чыгарылды.

2020-04-20 10:03:00

Тилекке каршы, 20-апрелге карата 2 бейтап каза болду. Чүй облусунан бир аял киши 70 жашта, Ош шаарынан бир эркек киши 79 жашта болгон. Каза болгондордун өнөкөт оорулары болгон.
Жалпысынан республикада COVID-19дан 7 адам каза болду.

2020-04-20 10:02:00

Сутка ичинде 14 жарандан коронавирус аныкталды. Алар төмөнкү аймактардын тургундары:

Бишкек шаары – 4;
Чүй облусу – 2;
Ош шаары – 4;
Жалал-Абад облусу - 3;
Нарын облусу – 1.

Муну менен ооругандардын жалпы саны 568ге жетти.

Автор: Бактыгүл Момбекова