Дүйшөнбек Зилалиевдин баш коргоо чарасы өзгөртүлдү

Мурдагы вице-премьер-министр Дүйшөнбек Зилалиевдин баш коргоо чарасы өзгөртүлдү. Бул тууралуу SUPER.KG`ге Биринчи Май райондук сотунун басма сөз кызматынан билдиришти.

Маалыматка ылайык, Биринчи Май райондук сотунун 2021-жылдын 6-декабрындагы токтомунун негизинде айыпталуучу Дүйшөнбек Зилалиевдин баш коргоо чарасы өзгөртүлгөн. Аны абакта кармоо чечими эч жакка кетпөө түрүндөгү бөгөт коюу чарасына алмаштырылган.

Окуянын чоо-жайы:

Дүйшөнбек Зилалиевге карата "мыйзамсыз байыган" деген айып менен кылмыш иши козголуп, ал 7-декабрда кармалган. Ошол эле күнү сот аны 2 айга камакка алуу чечимин чыгарган. УКМК Зилалиевден декларациясына киргизилбеген 889 миң 900 доллар акча табылып, ал акча коммерциялык банктардын биринде 2018-жылдын сентябрына чейин сакталганын айтып чыккан.

УКМК тараткан видеодо банктагы ячейкалардын биринен Зилалиевдики делинип 889 миң 900 доллар алынып жаткандыгы көрсөтүлөт. Бул видео боюнча “Оптима банк” билдирүү жарыялаган. Аталган банк ал видео бир жыл мурун банктын кызматкерлери тарабынан тартылганын билдирген. Ячейканы ачууга кардардын ижара келишиминин мөөнөтү аяктагандыгы себеп болуп, акча жана аны ячейкадан чыгаруу учурунда тартылган видео ээсине өткөрүп берилгенин кошумчалаган.

Мурдагы вице-премьер-министр 2020-жылдын 5-октябрь күнү Биринчи Май райондук сотунун өкүмү менен 9 жылга эркинен ажыратылган.

Автор: Кенжебай Сатканалиев