Америкалык авиакомпания Хабиб Нурмагомедов менен болгон чыр боюнча билдирүү жасады

Атактуу мушкер Хабиб Нурмагомедовдун стюардесса менен болгон түшүнбөстүгүнөн кийин мушкерди учагынан түшүрүп салган америкалык Frontier Airlines авиакомпаниясы окуя боюнча расмий билдирүү таратты.

Америкалык авиакомпания мушкер стюардессанын суроолоруна толук жооп бербегендиктен учактан эрежеге ылайык түшүрүлгөнүн билдирди.

"2025-жылдын 11-январында Лас-Вегастан Сан-Франциского №4401 рейси учууга даярданып жатканда, стюардесса чыгуучу катардагы жүргүнчүлөргө түшүндүрүү иштерин жүргүзгөн. Чыгуу катарында отурган кардар Хабиб Нурмагомедовго өзгөчө кырдаал болгон учурда жардам көрсөтүүгө даярдыгы тууралуу бир нече суроолор берилген. Стюардессанын айтымында, Нурмагомедов мырза андан бул маалыматты алууга бир нече жолу аракет кылганына карабай жооп берген эмес. Стюардесса Нурмагомедовго башка жакшыртылган орунга которулушу же учакты таштап кетүүгө мажбур болушу мүмкүн экенин эскерткен.

Кардардын алгачкы аракетсиздигинин жана орун алмаштыруудан бир нече жолу баш тартуусунун натыйжасында, авиакомпаниянын эрежелерине ылайык, аны учактан түшүрүү сунушталган. Жүргүнчүнү түшүрүү чечими анын улутуна эч кандай тиешеси жок жана биз ага жана анын жүргүнчүлөрүнө рейс үчүн акчасын кайтарып бердик", - деп билдирди Frontier Airlines авиакомпаниясы.

Эске сала кетсек, UFC уюмунун жеңил салмактагы мурдагы чемпиону Хабиб Нурмагомедов АКШда учактан чыгарылган. Буга стюардесса менен болгон чыр себеп болгон.

Видеого караганда, байлыгы 40 миллион долларга бааланган ММА жылдызы эконом-класста билет алган.

Автор: Азат Бейшенбеков