Өлкөдө 55 миңден ашуун аз камсыз болгон үй-бүлөгө электр энергиясынын тарифи жеңилдетилген

Кыргызстанда 55 миң 494 аз камсыз болгон үй-бүлөлөр электр энергиясына жеңилдетилген тарифтер менен төлөшөт. Бул тууралуу Эмгек, социалдык камсыздоо жана миграция министрлиги билдирет.

Маалыматка ылайык, айына 700 киловатт саатка чейин электр энергиясын керектөөдө тариф 50 тыйынды түзгөн.

"Ал эми Кыргызстанда 2024-жылдын май айынан тарта электр энергиясына тарифтер көтөрүлгөнүнө байланыштуу бул үй-бүлөлөр 55,4 тыйындан төлөй башташты. 2025-жылдын 1-февралына карата «үй-бүлөгө көмөк» жөлөкпулун алган үй-бүлөлөрдүн саны 58,4 үй-бүлөнү түзөт. Электр энергиясына жеңилдетилген тарифтер түрүндө даректүү социалдык колдоо «үй бүлөгө көмөк» ай сайын берилүүчү жөлөкпул алган 55 миң 494 аз камсыз болгон үй-бүлөгө көрсөтүлдү, бул 94,9 пайызды түзөт", - деп айтылат маалыматта.

Жеңилдетилген тарифтерди ижарага алынган батирлерде, өндүрүштүк жайларда жашагандар, электр жарыгысыз жашаган үй-бүлөлөр ала албайт. Бул боюнча түшүндүрүү иштери жүрүп жаткандыгы маалыматта кошумчаланган.

Белгилей кетсек, 2022-жылдан тарта президенти Садыр Жапаровдун демилгеси менен ай сайын берилүүчү "Үй-бүлөгө көмөк" жөлөкпулун алган аз камсыз болгон үй-бүлөлөргө электр энергиясына жеңилдетилген тариф түрүндө кошумча социалдык колдоо көрсөтүлүүдө.

Автор: Замира Ниязбекова