УМККнын мурдагы башчысы Мурат Суталинов сурак берүү учурунда Апрель окуясы боюнча массалык атууга катышы жок экендигин айтты

УМККнын мурдагы башчысы Мурат Суталинов бүгүн, 14-январда 2010-жылдагы Апрель окуясына байланыштуу сотто сурак бере баштады. “Мен Бакиевдер менен сүйлөшүүлөргө барган эмесмин, экспертиза далилдегендей, УМККнын куралдарынан ок атуу болгон эмес. Мени мен бербеген буйруктар үчүн айыптап жатышат”,- деди Мурат Суталинов. Ага “Тынч демонстранттарды өлтүргөн”, “Кызмат абалынан кыянаттык менен пайдаланган” деген айыптар тагылууда. Ал "2010-жылдын 7-апрелинде М.Суталинов өлкөдөн качкан, бирок 2011-жылы Кыргызстанга кайтып келген" деген ИИМдин билдирүүсүн четке какты.

Эске сала кетсек, 2010-жылдын 7-апрели боюнча сот 2011-жылдын ноябрында башталган жана сот процесси өтүп жаткан Спорт Ордосунда болгон жардырууга байланыштуу токтотулган. 2012-жылы жазында М.Суталиновдун онкологиялык дарты бар экендиги аныкталып, бир катар операцияларды жасаткан. Күзүндө ал иммунотерапия курсун алып, буга байланыштуу сот процесси токтотулган.

Автор: Гүлмайрам Сабырбекова