Исфана шаарында өрттөнгөн базардын ичиндеги ашкана, кафе жана соода түйүндөрү күйүп кетти

Исфана шаарындагы "Лейлек" дыйкан базарында чыккан өрттүн кесепетинен ашкана, кафе, соода түйүндөрү өрттөнүп кетти. Бул тууралуу бүгүн, 20-майда SUPER.KG порталына Өзгөчө кырдаалдар министрлигинин басма сөз кызматынан билдиришти.

Маалым болгондой, 20-майга караган түнү саат 02:40 чамасында "Лейлек" керек-жарак коомуна жана жеке ишкерлерге таандык соода түйүндөрү, анын ичинде ашкана, кафе, соода дүкөндөрү күйүп кеткен. Окуя болгон жерге 4 өрт өчүрүүчү, 1 даана жолго суу чачуучу, 4 жеке суу ташуучу унаа тартылган. Өрт эртең менен саат 06:10 чамасында өчүрүлгөн.

Учурда өрттөнгөн базар аймактык ички иштер бөлүмүнүн кызматкерлери тарабынан курчоого алынып, кайтарылууда. Алдын ала маалыматтарга ылайык, базардын 500-700 чарчы метр аянты өрттөнгөн. Адам өмүрүнө зыян келген эмес. Азыркы тапта өрттүн келип чыгуу себеби жана келтирилген чыгымдарды аныктоо иштери жүрүүдө.

Автор: Алина Токтакунова