Депутат: "Жабык эшик артындагы жыйында кыргыз-тажик чырын өкмөт тез аранын ичинде чечсин деген маселе коюлду"

Жогорку Кеңеште жабык эшик артындагы жыйында эки элдин тирешүүсүн өкмөт тез аранын ичинде чечсин деген маселе көтөрүлдү. Бул тууралуу бүгүн, 14-мартта SUPER.KG порталына депутат Таабалды Тиллаев билдирди.

"Маселенин жабык эшик артында талкууланганынын себеби - чек ара маселеси. Бул маселеде ачык айтыла турган жана айтылбай турган нерселер бар. Жыйында чыр-чатак чыккан аймакта болуп жаткан кырдаал талкууланды. Жабылган жолду ачып, эки элдин тирешүүсүн эки өкмөт тез аранын ичинде чечсин деген маселе коюлду", - деди Тиллаев.

Анын айтымына караганда, маселе жыйындын түшкө чейинки бөлүгүндө толук талкууланып бүткөн жок, түштөн кийинки бөлүктө да ушул маселени талкуулоо улантылды.

Жогорку Кеңештин жалпы жыйынында бүгүн Кыргыз-Тажик чек арасы боюнча маселе бир нече жолу көтөрүлдү. Алгач тиешелүү суроолорго өкмөттүн өкүлдөрү саат 11ден кийин жооп бермей болгон.

Окуянын чоо-жайына кайрылсак:

13-мартта Кыргыз-Тажик чек арасындагы жаңжалдан улам 5-6 адамга таш тийип жаракат алышканы маалымдалган. Дагы бир адамга ок тийип, ага Баткен облустук ооруканасында операция жасалганы белгилүү болду. Ал эми Тажик тараптын басылмалары жаңжалдан 1 адам каза болуп, 20 киши жабыркаганын жазды.

Автор: Мальвина Уметбекова
Фото: Мальвина Уметбекова