Бүгүн, 21-июлда Орусиянын Борбордук,
Батыш, Урал, Сибирь жана Ыраакы Чыгыш округдарында жашаган мекендештердин башын бириктирген 29 коомдук уюмдун жана кыргыз
диаспораларынын лидерлери күздө өтүүчү парламенттик шайлоодо "Ата
Мекен" социалисттик партиясын колдошорун билдиришти. Алар тараптан 5 талапкер
"Ата Мекен" партиясынын катарында шайлоого катышарын маалымдашты.
"Советтер Союзу кулаган соң, өлкөбүздүн жүз миңдеген жарандары алыскы жана жакынкы чет
өлкөлөргө жан багуу үчүн чилдей тарап кетишкен. Бул жылдар аралыгында алгач барган
жердештерибиз өздөрүнүн жашоо-тиричилигин оңдоого, жаңы турмуш курганга да жетишкен. Эми биздин ишибиз, үйүбүз бар, көбүнүн ишкердиги да өнүгүп
жатат. Республиканын кирешесинин сезилерлик бөлүгүн Орусияда иштеген
мигранттардан чегерилген акча каражаттары түзөрүн коомчулук билет. Ошол агылып
келип жаткан кирешелердин максатсыз пайдаланылып жаткандыгы бизди өкүнтөт. Биз
азыр кыргыз өкмөтүнөн бир гана нерсени сурап келүүдөбүз - бул мигранттардын
турмуш-тиричилигин жакшыртууга багытталган мыйзамдарды кабыл алып берүү",- деди Кыргыз Республикасынын
эмгек мигранттарынын аймактар аралык коомдук бирикмесинин төрагасы Алишер
Маданбеков.
Жыйындын катышуучуларынын бири "Кыргызстандык ишкерлер биримдиги" уюмунун төрагасынын орун басары Таалай
Мустапакуловдун айтымында, мигранттар ар кандай формада мыйзамдык деңгээлде жардам берүүсүн өтүнүп кыргыз өкмөтүнө кайрылышкан. Андан сырткары Эмгек, миграция жана жаштар министрлигине, Жогорку Кеңешке бир нече ирет
кайрылышкан, бирок натыйжа чыккан эмес.
"Биз
кош жарандуулук маселесин көтөрдүк, анткени Орусиядагы каралган чаралардан
улам 200 миңден ашык мигранттар эки анжы абалда калышты. 4 жыл мурун биз Жогорку Кеңештин фракция лидерлерине кайрылганга аргасыз болдук. "Ата Мекен" фракциясы
гана жооп кылып, кош жарандуулук боюнча мыйзам долбоорун демилгелесе, парламент
колдобой койду. Биздин көйгөйлөр көп, айрыкча мигранттардын укуктарын коргоо
боюнча мыйзамдар зарыл. Бул маселелерди чечүүдө саясат абдан маанилүү
орунда турат. Ошондуктан бизге Орусиядагы кыргыз диаспоралары үчүн күзгү
шайлоолордо кимдин жеңери абдан маанилүү. Жасаган ишин, убадага бек турушун,
мигранттарга жардам бере ала тургандыгын карап туруп биз, 200 миңден ашык
кыргыз жарандарынын башын бириктирген 29 уюмдун башчылары, шайлоодо "Ата Мекен" социалисттик партиясын колдоону чечтик",- дейт Орусиянын Сибирь округундагы
"Мекендештер" конгрессинин өкүлү Бекболот Курманбаев.
Төмөнкү коомдук уюмдар, фонддор жана диаспоралар
"Ата Мекен" социалисттик партиясынын чечкиндүү кадамдарын баалап,
күздө өтүүчү парламенттик шайлоодо колдоону чечишкен: "Кыргыз биримдиги" (Балашиха), "Кыргызстандык ишкерлер биримдиги",
"Мекенчил жаш", "Аксакалдар кеңеши", Кыргызстандын
эмгек мигранттарынын аймактар аралык коомдук бирикмеси, "Санат-Ордо", "Мекендештер",
"Биримдик", Псков, Ярославль, Вологод, Калининград, Волгоград,
Магадан, Рязань облустарындагы, Приморья крайындагы кыргыз диаспоралары,
"Кыргызстан аялдары", "Соотечественники-Мекендештер",
"Кыргыздар союзу" (Чита шаары), "Ала-Тоо" (Бурятия),
"Дружба" (Иркутск шаары), "Менин Кыргызстаным - Мой Кыргызстан" (Абакан шаары), "Жергиликтүү кыргыз улуттук-маданий автономиясы" (Новосибирск шаары), "Достук" (Тыва
Республикасы, Кызыл шаары), "Жергиликтүү Кыргыз улуттук-маданий
автономиясы" (Томск), "Содружество кыргызстанцев" улуттук-маданий
уюму (Омск), Мигранттардын "Манас-Ата" борбору (Новокузнецк шаары). Ошондой эле өздөрүнүн 5 талапкери менен "Ата
Мекендин" катарында күзгү парламенттик шайлоого аттанышты.
Жыйындын
жүрүшүндө жаш талапкер Темирлан Бекботоев: "Азырынча биздин идеяларды ар
тараптуу колдогон бир гана "Ата Мекен" партиясы болду. Кош
жарандуулук боюнча мыйзамды талкуулоо учурунда "Ата Мекен" фракциясы
мигранттарга барып талкуу өткөргөн жалгыз фракция болгон. Биз "Ата
Мекендин" катарында кыргыз парламентине өтүп келип, кыргыз мигранттарынын
маселелерин ар тараптуу чечүүгө бел байладык. Бул жагынан бизге "Ата
Мекен" партиясы көмөк көрсөтөрүнө ишенебиз",- деди ал.
Азыр
кыргыз жеринде миграция маселеси курч турат. Лидерлердин айтымында, азыр зарыл
мыйзамдардын жоктугунан кыргыз өлкөсүнүн 200 000ден ашык жарандары 2 мамлекеттин тең
атуулу эмес болушуп, арсар жашоо кечиришүүдө. Евразиялык экономикалык
биримдикке киргенде биздин жарандардын укуктары кеңейиши керек, ошого жараша мыйзамдарды
кабыл алуу жаңы Жогорку Кеңештин милдети болуп эсептелет. "Ата Мекен"
социалисттик партиясы бул багытта азыртадан эле алгылыктуу иштерди аткарууга
киришти.
