Аргентиналык футболчу фейерверк аттырып жатып, жаракат алып ооруканага түштү

Уругвайдын "Пеньяроль" футболдук клубунун чабуулчусу Лукас Вьятри фейерверк аттыруу учурунда жаракат алып ооруканага түштү. Бул тууралуу бүгүн, 1-январда чет өлкөлүк басылмалар жазып чыгышты.

Маалыматка ылайык, Жаңы жыл майрамын майрамдап жаткан футболчу фейерверкти күйгүзүп жатканда ал ойлогондон эрте атылып кеткен. Жалын анын бетине да тийип, дарыгерлерден жардам алууга муктаж болгон. Дарыгерлер анын көзүнөн ажырап калуусуна аз калгандыгын, айыгуусуна жок эле дегенде 2-3 ай убакыт керектеле тургандыгын айтышкан.

Айта кетсек, Вьятри аргентиналык "Боку Хуниорс" клубунун тарбиялануучусу, ал Мексика, Кытай, Эквадор жана башка өлкөлөрдүн футболдук клубдарынын жана Аргентинанын курамында да ойногон.

Автор: Кенжебай Сатканалиев