Кумарканадан 500 миң сом уттурган адам: "Бишкекте казинолор дагы деле иштеп жатат. Тийиштүү органдарга кайрылсам, ишти жаап коюшуптур"

Учурда Кыргыз өлкөсүндө кумар оюндарына тыюу салынганы менен дагы да болсо өз ишин улантып жаткан кумарканалар бар. Бул тууралуу SUPER.KG порталына Тимур аттуу мырза (аты өзгөртүлүп берилди) билдирди.

Анын айтымында, ал өзү ошол кумарканалардын курмандыгына айланып, 500 миң сомго жакын акчасын уттурган.

"Мен өзүм жакшы эле жерде иштечүмүн. Ушул жылдын февраль айында такси кызматында иштеген досум кумарканага бара турганын айтып, менин кошо баруумду өтүндү. Макул болуп, бардым. Ал жакка киргенде чай, сок, кофе каалаганыңды алып келип беришет экен. Мен чай ичтим. Бир аз туруп кайра эле ошол чайды ичким келди. Эмнегедир аны ичкен сайын башкача болуп, оюнга кандайча берилип кеткенимди өзүм түшүнбөй калдым. Ошентип ал күнү 20 миң сомдон ашуун акчамды уттуруп жибердим. Андан кийин уттурган акчамды кайра акташ үчүнбү же кандай, өзүм да жакшы билбейм, айтор ал жакка бат-баттан бара турган болдум. Таң калычтуусу бир да жолу уткан жокмун, ар бир барган сайын чоң суммадагы акчаларды уттуруп жаттым. Жалпысынан уттурган акчалардын эсеби 500 миң сомго чейин жетти. Акыркы жолу барганда 100 миң сом уттуруп, ошондо гана өзүмө келип, көзүм ачылгандай болду. Чынын айтсам анча акча өзүмдүкү эмес, ар кимден алган каражаттар болчу. Ал гана эмес бирөөнүн унаасын күрөөгө коюп, акча алган учур да болгон", - деди ал.

Ошондой эле, болгон окуядан кийин Экономикалык кылмыштуулукка каршы күрөшүү кызматына кайрылып, азыркы учурда тыюу салынганына карабай иштеп жаткан кумарканаларды териштирип, аларды жаптыруу үчүн арыз жазганын, бирок андан эч кандай жыйынтык чыкпаганын айтты.

"Менин башымдан өткөн окуя башкаларга да сабак болсун дейм. Анткени канчалаган карапайым калк ошол кумарканалардын курмандыгына айланып, карызга батышын каалабайм. Мындан улам казинолорду жабууну талап кылып, 6-март Экономикалык кылмыштуулукка каршы күрөшүү кызматына кайрылгам. Ал жакта бул ишти кароону Айбек деген кызматкер моюнуна алган. Көп өтпөй эле ал эс алууга чыгып жатканын айтып, ишти Өмүрбек деген тергөөчүгө өткөрүп бергенин билдирди. Бирок иш териштирилген жок. Көрсө 26-март күнү кумаркананын жетекчилери менен сүйлөшүү жүргөн соң иш жабылган экен. Аны мага 28-март күнү айтып, иш жабылгандыгы тууралуу кагазды колума карматышты", - деди ал.

Мындан улам SUPER.KG порталы Экономикалык кылмыштуулукка каршы күрөшүү кызматында иштеген Өмүрбек аттуу тергөөчү менен байланышып, "Кумаркананын курмандыгына айланган адамдын бизге кайрылганы чын. Бирок мен бул иш боюнча эч кандай маалымат бере албайм. Ал үчүн биздин жетекчи менен байланышып, андан уруксат алуу керек", - деген жооп алды.

Порталдын журналисттери жогоруда Тимур мырза айткан кумарканага барып, чынында эле ал жакта кадимкидей оюн болуп жатканына күбө болушту. Андан ары Экономикалык кылмыштуулукка каршы күрөшүү кызматын көздөй сапар улап, ал жактан жогоруда тергөөчү айткан жетекчи менен жолугушууну чечишти. Бирок ал жактын кабылдамасындагы кызматкер жетекчи менен байланышып, журналисттер жолугуу үчүн келгендигин айтканда, жетекчи эч кандай себепти түшүндүрбөстөн кабыл ала албай тургандыгын билдирип, жолугуудан баш тартты.