УКМКнын мурдагы жетекчиси Мурат Суталинов оор илдетине байланыштуу жазадан бошотулушу мүмкүн

УКМКнын мурдагы жетекчиси Мурат Суталиновдун оор илдетке чалдыкканына байланыштуу жазасынан бошотуу тууралуу документтер сотко өткөрүлдү. Бул тууралуу бүгүн, 24-январда Жаза аткаруу кызматынын басма сөз катчысы Элеонора Сабатарова SUPER.KG порталына тастыктады.

Маалыматка ылайык, учурда Суталиновдун ден соолугу күндөн-күнгө начарлагандыгына байланыштуу Улуттук онкология борборунда химиотерапия алып жатат.

"Мурат Суталинов улам алып туруучу химиотерапиядан өтүүдө. Ал жазадан бошотулушу мүмкүн делген адамдардын категориясына кирет. Мурат Суталинов Саламаттыкты сактоо министрлигинин атайын комиссиясынын текшерүүсүнөн да өттү. Аны жазадан бошотуу документтери Ленин райондук сотуна жөнөтүлдү. Жакын арада бул маселе каралат", - деди Сабатарова.

Мурат Суталинов 2006-2010-жылдары УКМКны башкарган. Ал "2010-жылы 7-апрелде митингге чыккан адамдарга каршы курал колдонгон жана кызмат абалынан ашыкча пайдаланган" деген айыптын негизинде 20 жылга соттолгон.

Автор: Наргиза Өмүрбек кызы