Нурлан Калыбеков Жазуучулар союзунун төрагасы болуп шайланды

Жазуучулар союзунун төрагалыгына талапкер - Тынчтыкбек Нурмамбетов

Жазуучулар союзунун мурдагы төрагасы - Акбар Рыскулов

Жазуучулар союзунун төрагасы - Нурлан Калыбеков

Бүгүн, 8-февралда Бишкекте Кыргыз жазуучулар союзунун жыйыны болду. Жыйында мурунку төрага Акбар Рыскулов кызматын тапшырып берип, Жазуучулар союзунун президиумунун мүчөлөрү тарабынан жаңы төрага шайланды.

Союздун жетекчилигине учурдагы төраганын орун басары Тынчтыкбек Нурмамбетов жана мурдагы орун басар Нурлан Калыбеков талапкерлигин койду. Жалпы 44 шайлоочу катышкан жабык добуш берүүдө Нурмамбетов 19 добуш алып калса, Калыбеков 25 добуш менен жеңишке жетишти.

5 жылдык мөөнөткө шайланган жаңы төрагага Кыргыз Эл акыны Акбар Рыскулов ийгилик каалап, кыргыз адабиятынын өсүп-өнүгүшүнө өз салымын кошоруна ишенерин билдирди.

Өз кезегинде Нурлан Калыбеков ишеним көргөзгөнү үчүн акын-жазуучуларга ыраазычылыгын айтып, Чыңгыз Айтматов, Аалы Токомбаевдердей улуу инсандардан калган союздун келечеги үчүн болгон аракетин жумшоого убада берди.

Нурлан Калыбеков 1973-жылы Жалал-Абад облусундагы Аксы районунун Аркыт айылында туулган.

1998-жылы Кыргыз улуттук университетинин журналистика жана философия бөлүмүн аяктап, 2003-жылга чейин аталган университетте ага окутуучу болуп эмгектенген.

2009-2014-жылдары чыгармачыл жаштардын "Нурборбор" коомдук бирикмесин жетектеген.

2011-2014-жылдары Кыргыз улуттук жазуучулар союзунун төрагасынын орун басары болгон.

Кыргыз өлкөсүнүн Жолон Мамытов, Казакстандын Мукагали Макатаев, Габит Мусрепов, Орусиянын Сергей Есенин атындагы адабий сыйлыктарынын лауреаты. Кыргыз өкмөтүнүн жаштар сыйлыгынын ээси, Маданияттын мыкты кызматкери жана 90го жакын китептин автору.