Саясатчы Адахан Мадумаров кечээ, 16-сентябрда Кыргыз-Тажик чек арасындагы абалдын күчөгөндүгүнө байланыштуу пикирин айтты. Анда ал тиешелүү адамдар муну пикир катары эмес, кайрылуу катары кабыл алса туура болот дейт. Ал чек арада бир нече адамдын жаракат алып, бир адамдын каза болушун өтө кайгылуу окуя деп сыпаттап, тарыхтагы кайгылуу барактардын бири болуп каларын белгиледи.
"Ушул иштерди болтурбай коюуга мүмкүнчүлүк бар беле деген суроо жаралат. Ооба, бар болчу, азыр да бар. Мындан ары күчөтпөй коюунун жолдору бар. Биринчиден, бийлик колунан иш келген азаматтарды ошол жерлерге коюшу керек. Түк эч нерсени түшүнбөгөн, сабатсыз, бийликке жагынгандарды алып келип алгандын кесепетинен бир топ туура эмес иштер болуп кетти.
Мен ошол жерде туруп, колунда куралы жок болсо да чек араны кайтарып турган элге ыраазычылык билдирем. Баткенден келип, бийликке жерди сактап калууга коңгуроо кагып, аракет кылган жергиликтүү кеңештин депутаттарына ыраазычылык билдирем.
Ал эми бийлик тескерисинче, аларды чакыртып алып суракка алып жатат. Мындай чыккынчылык бизде болгон эмес", - деген Мадумаров бүгүнкү бийликтин, тиешелүү кызматтардын элдин ишенимин, үмүтүн актаганга акылы жетпей турганын белгилеген.
Ошондой эле Мадумаров алар жалаң гана саясат менен алек болуп жатканын, бири-бирин каралап, жамандоо менен алек экенин айтты. Ал облустук, райондук же мамлекеттик деңгээлдеги жетекчилерге кайрылып, ишти аткаруу колунан келбей жатса, аны моюнуна алып кызмат ордун бошотууга чакырды.