Өкмөт: "Республика боюнча үй карантининде 28 миң 592 адам бар"

Жарандарга вирустун жугушун жана өлкө аймагына коронавирус инфекциясынын жайылышын алдын алуу максатында атайын жайлар даярдалган. Бул тууралуу өкмөттүн басма сөз кызматынан билдиришти.

Маалыматка ылайык, вирус жуктурду деп шектелгендерди инфекциянын инкубациялык мезгилинде оолак кармоо үчүн даярдалган обсервациялык жайларга 9 миңден ашык адам жайгаштырылган, алардын 7 миң 202си медициналык кароонун жыйынтыгы менен үйлөрүнө карантинге жиберилген. "Мындан тышкары атайын медициналык көрсөтмөлөрдү эске алуу менен айрым жарандар, анын ичинде чет өлкөдөн келгендер обочолонуу режимине же үй карантинине алынган. Бул учурда карантинге алынгандардан башка адамдар менен байланышпай турганы жөнүндө жазуу түрүндө милдеттенме алынат. Жалпы республика боюнча үй карантининде бардыгы болуп 83 миң 638 адам алынган, учурда алардын 28 миң 592си үй карантининде, 55 миң 46 адам карантинден чыкты", - деп жазылат маалыматта.

Бирок алынган милдеттенмелерге карабастан, айрымдар обочолонуу режимин бузуп жатат. Алар бул аракети менен башка адамдардын өмүрүнө жана ден соолугуна гана эмес, COVID-19га каршы күрөшүү боюнча саламаттыкты сактоо органдары тарабынан кабыл алынган чаралардын натыйжалуулугуна коркунуч жаратууда.

Жоруктар жөнүндө кодексинин 127-беренесине ылайык, өзгөчө кырдаал режиминин шарттарында чектөө иш-чараларынын талаптарын бузуу - I категориядагы айып пул түрүндөгү жазага алып келет (жашы жете электер үчүн 5 000 сомдон 15 000 сомго чейин, башка жеке жактар үчүн 20 000 сомдон 30 000 сомго чейин);
Өзгөчө же аскердик абалдын шарттарында көрсөтүлгөн чектөө иш-чараларынын талаптарын бузуу - II категориядагы айып пул түрүндөгү жазага алып келет (жашы жете электер үчүн 15 000 сомдон 25 000 сомго чейин, башка жеке жактар үчүн 30 000 сомдон 60 000 сомго чейин);
Кылмыш-жаза кодексинин 280-беренесинин 1-бөлүгүнө ылайык, санитардык-эпидемиологиялык эрежелерди атайылап же байкабастыктан бузуу аркылуу адамдардын массалык жабыр тартуусуна же болбосо башка ири зыян келтирүүгө алып келсе, VI категориядагы айып пул түрүндөгү жазага алып келет (жашы жете электер үчүн 120 000 сомдон 140 000 сомго чейин, башка жеке жактар үчүн 260 000 сомдон 300 000 сомго чейин) же II категорияда эркинен ажыратуу каралат (жашы жете электер үчүн – бир жыл алты айдан эки жыл алты айга чейин, башка жеке жактар үчүн – эки жыл алты айдан беш жылга чейин).

Жалпысынан үй карантинин бузгандыгы үчүн 45 адам жоопко тартылды.

Автор: Жылдыз Джускембаева