Тогуз ай ичинде 26 миң өлүм. Өткөн жылга салыштырмалуу пневмониядан каза болгондордун саны 2,5 эсеге көбөйдү

2019-жылга салыштырмалуу быйыл пневмониядан каза болгондордун саны 2 жарым эсеге көбөйдү. Мындай маалымат Улуттук статистикалык комитети тарабынан белгилүү болду.

Саламаттыкты сактоонун ыкчам маалыматы боюнча, 2020-жылдын январь-сентябрь айларында пневмония менен ооругандардын саны 26 миңди түзгөн. Ал эми 2019-жылдын 10 айында 24 миң бейтап катталган.

Январь-сентябрда пневмония оорусу менен жабыркагандар

	2019-жыл (жалпы)	2020-жыл (жалпы)
Кыргыз Республикасы	23 миң 990	26 миң 48
Баткен облусу	3 миң 201	2 миң 292
Жалал-Абад облусу	4 миң 539	3 миң 888
Ысык-Көл облусу	2 миң 144	4 миң 160
Нарын облусу	1 миң 316	1 миң 705
Ош облусу	4 миң 722	3 миң 975
Талас облусу	1 миң 111	1 миң 234
Чүй облусу	3 миң 625	4 миң 43
Бишкек шаары	2 миң 178	4 миң 166
Ош шаары	1 миң 135	545
Медициналык кызмат көрсөтүүчү башка обочолонгон аймактык бөлүмдөр	19	40

Пневмония оорусу өткөн жылдын январь-сентябрь айларына салыштырмалуу Бишкек шаарында жана Ысык-Көл облусунда көбүрөөк катталганы белгиленди.

2020-жылдын январь-сентябрында өлүмдүн себептери боюнча өлгөндөрдүн жалпы санынын ичинен жарымынан көбү (52 пайызы) кан айлануу системасынын ооруларына, 11 пайызы - шишик ооруларына жана дем алуу органдарынын ооруларына - 7 пайызы туура келди.

Өткөн жылдын январь-сентябрь айларында пневмониядан каза болгондордон 100 миң кишиге 9 маркум туура келсе, 2020-жылда 100 миң кишиге 23 каза болгон жаран туура келген же 2 жарым эсеге көп.

Автор: Бактыгүл Момбекова