Прокуратура Ырыс Жекшеналиевдин ишин кайра кароо өтүнүчүн берди

Прокуратура Бишкектин Биринчи Май райондук сотунун блогер Ырыс Жекшеналиевди актаган чечимине каршы Бишкек шаардык сотуна арыз берип, ишти сотто кайра кароо өтүнүчүн берди. Бул тууралуу бүгүн, 9-январда укук коргоочу Гүлшайыр Абдирасулова социалдык тармактагы баракчасына жазды.

"Ырыс Жекшеналиевдин иши 1,5 жылга созулду. Анда прокуратура Ырысты жети жылга кесүүнү сураган. Эми ишти кайра кароого жибергиле деп жатат", - деп жазган укук коргоочу.

Белгилей кетсек, 4-декабрда Бишкектин Биринчи Май райондук соту Ырыс Жекшеналиевди толук актап, ага коюлган айыптарды алган.

Жекшеналиев 2022-жылы 14-августта УКМКнын мурдагы төрагасы Абдил Сегизбаевдин "Жетим-Тоонун" казылуусуна каршы чыккан эски видеосун жарыялагандыгы үчүн суракка чакырылып, камакка алынган.

Активистке Кылмыш-жаза кодексинин “Калайман башаламандык” беренесинин “Бийлик өкүлдөрүнүн мыйзамдуу талаптарына баш ийбөөгө жана массалык башаламандыктарга чакырыктар, ошого тете жарандарга зомбулук көрсөтүүгө чакырыктар” деген бөлүгү менен кылмыш иши козголгон.

Автор: Айпери Бакталбек кызы
Фото: Ырыс Жекшеналиев