Кремль Трамп менен “олуттуу диалогго” даяр

Владимир Путин менен Юрий Ушаков

Орусия АКШнын президенти Дональд Трамптын командасынан Украинадагы жаңжалды жөнгө салуу боюнча конкреттүү сунуштарды ала элек. Бул тууралуу журналисттерге орус президентинин жардамчысы Юрий Ушаков билдирди.

"Биз буга чейин айткандай, азыр биздин президенттердин сүйлөшүүсүнө негиз боло турган конкреттүү сунуштарды алууга даярбыз жана бул байланыштар учурунда биз Америка Кошмо Штаттарынын мүмкүн болуучу ойлору жана сунуштары боюнча өз позициябызды белгилейбиз. Биз албетте, Трамптын бул билдирүүсүн журналисттердин алдында айтканын эске алабыз жана биз олуттуу диалогго даярбыз", - деп белгиледи Ушаков.

Буга чейин Трамп Украинадагы жаңжалды жөнгө салуу жана тиешелүү келишим түзүү Орусиянын президенти Владимир Путиндин кызыкчылыгына жооп берерин айткан.

"[Украинанын президенти Владимир] Зеленский келишимди каалайт. Путин аны каалайбы, билбейм. Ал келишим түзүшү керек. Менимче, ал келишим түзүүдөн баш тартуу менен Орусияны жок кылат. Анда Орусия чоң көйгөйлөргө туш болот", - деди АКШнын жаңы шайланган президенти журналисттер менен болгон маегинде.

Трамп бул көйгөйдү чечүү үчүн Путин менен “мүмкүн болушунча тезирээк” жолугушууга умтулуп жатканын белгилеген.

Автор: Бек Оморбеков