Эрдоган Түркия орус-украин тынчтык сүйлөшүүлөрү үчүн идеалдуу аянтча экенин айтты

Түркиянын президенти Режеп Тайып Эрдоган бүгүн, 18-февралда Анкарада Украинанын президенти Владимир Зеленский менен жолугуп, Украинанын аймактык бүтүндүгүн колдоорун ырастады жана Түркия келечектеги тынчтык сүйлөшүүлөрү үчүн аянтча катары кызмат кылууга даяр экенин билдирди.

Эрдоган менен Зеленский Анкарадагы президенттик комплексте биргелешкен маалымат жыйынын өткөрүштү. Лидерлер эки тараптуу мамилелерди, коопсуздук маселелерин жана жаңжалды тынчтык жолу менен чечүүнүн келечегин талкуулашты.

Эрдоган уланып жаткан согушка байланыштуу украин элине көңүл айтып, Түркиянын башынан бери тынчтык демилгелерине активдүү катышканын эске салды.

"Биз башынан эле согушта жеңүүчү болбойт, ал эми тынчтыкта жеңилгендер болбойт деген принциптин чегинде аракеттендик. Биз түз сүйлөшүүлөргө катышып, дан келишимин түзүүнү демилгелеп, ар дайым ишенимдүү ортомчу болууга умтулганбыз", - деп белгиледи ал.

Ал ошондой эле Түркия өзүн активдүү дипломатиялык оюнчу катары көрсөткөндүктөн, Орусия, Украина жана Америка Кошмо Штаттарынын келечектеги сүйлөшүүлөрү үчүн идеалдуу жер бойдон кала берээрин кошумчалады.

Түрк президенти Орусиянын президенти Владимир Путин менен алдыдагы сүйлөшүүлөр жана мындан аркы дипломатиялык аракеттер тынчтыкка жетишүү процессин тездетүүгө жардам берет деген үмүтүн билдирди.

Автор: Бек Оморбеков