Бишкектик параармрестчилер Дүйнө чемпиондугунда жеңишке жетишти

10–23-сентябрь аралыгында Болгариянын Албена шаарында параармрестлинг боюнча Дүйнө чемпиондугунун 27-жолку турнири өтүп жатат. Бул мелдеш дүйнөлүк спорт календарынын маанилүү иш-чараларынын бири болуп саналат.

Мэриядан билдиришкендей, мелдешке теннис, паралимпиада жана спорттун күч түрлөрү боюнча ОРАБӨМдүн тарбиялануучулары катышып, Кыргызстандын намысын татыктуу коргоп, жогорку жыйынтыктарга жетишти:

Бекбоосун Токтосун уулу — Кыргызстандын тарыхында алгачкы жолу чоң жетишкендикке жетип, чоңдор арасында кыймыл аппараты бузулган спортчулардын 60 килограммга чейинки салмак ченинде (сол кол) 1-орунду ээледи.
Эрлан Камчыбек уулу — угуу жөндөмү чектелген спортчулардын арасында 60 килограммга чейинки салмак ченинде (сол кол) 3-орунду ээледи.

17-сентябрда мелдештер оң кол боюнча улантылып, кыргыз спортчулары дагы бир ирет байгелүү орундарды камсыздашты:

Бекбоосун Токтосун уулу — кыймыл аппараты бузулган чоңдор арасында 60 килограммга чейинки салмак ченинде (оң кол) 3-орун.
Эрлан Камчыбек уулу — угуу жөндөмү чектелген спортчулардын арасында 60 килограммга чейинки салмак ченинде (оң кол) 3-орун.

Автор: Ширин Марат кызы