Бишкекте Көчмөндөр оюндарынын ачылышы үчүн фан-зоналар уюштурулат

Бишкекте 31-августта VI Дүйнөлүк көчмөндөр оюндарынын салтанаттуу ачылыш аземи өтөт.

Бул күнү борбордун 4 районунда жана Ала-Тоо аянтында фан-зоналар уюштурулат. Ал жерде концерттик программалар, интерактивдүү иш-чаралар, улуттук оюндар өтүп, фотозоналар, көргөзмө аянтчалары, фуд-корттор жана эс алуу зоналары болот.

Негизги фан-зона Ала-Тоо аянтында жайгашат.
Октябрь районунда фан-зоналар Тунгуч кичи районундагы «Тунгуч-1» скверинде жана «Ынтымак-2» паркындагы амфитеатрда иштейт.
Ленин районунда фан-зоналар Фучик атындагы паркта, Ак-Ордо конушундагы «Ашар» паркында жана Жал кичи районундагы «Муун» скверинде уюштурулат.
Биринчи май районунда оюндардын ачылыш аземин Ч. Түлөбердиев атындагы паркта (Көкчөтай жана Түлөбердиев көчөлөрүнүн кесилишинде), Токтоналиев көчөсү, 62 дарегиндеги спорт комплексинде, ошондой эле Ак-Босого конушундагы Чүй көчөсү, 52 дарегинде жайгашкан скверден көрүүгө болот.
Свердлов районунда фан-зоналар Үсөнбаев көчөсү, 200/1 дарегиндеги «Алга» спорт комплексинде, Чыгыш-5 кичи районундагы №66 орто мектебинде (1А дареги) жана Энесай 1-көчөсү, 1 дарегиндеги №21 орто мектебинде иштейт.

Калаа бийлиги 28-августта билдиргендей, борбор калаанын төрт районунда уюштурулган бардык фан-зоналар саат 16:00дө өз ишин баштайт.

Автор: Айжанар Рыспек кызы
Фото: интернеттен алынды