Панкратион боюнча Евразиянын 2 жолку чемпиону Улан Эралиев мейманканада зордуктоодон качам деп терезеден секирип жиберген кызга тиешеси жок экенин SUPER.KG порталына билдирди.
Анын айтымында, ал бул окуяны 2 күн мурун уккан жана дале нес абалынан чыга элек.
"Бул окуя болгон күнү мен Ысык-Көлдө болчумун. Угуп нес болуп калдым. Кечээ борбор калаага келип Бишкек ШИИББине барып тактасам, мага эч кандай тиешеси жок экен. Анан кыздын дагы көрсөтмөсүндө менин атым аталбаптыр.
Менин жеке оюмча, айрым маалымат булактары божомолдуу берип салышкан. Андан ары сүрөттөрүм менен таркап кетиптир. Жактоочум менен мен тууралуу таратылган маалыматтарды алдырып жатабыз. Учурда маалыматты таркатты делген 3 маалымат булагы калды. Алардын үстүнөн иликтөө иштери жүрүүдө. Жалган маалымат берген сайт аныкталса, алардан далил талап кылабыз. Эгер далилдеп бере албаса, укуктук баа берүүгө муктаж болобуз.
Азыр мен Көчмөндөр оюндарына карата Ысык-Көл жергесинде жүрөм. Мени жакындан тааныгандар бул маалыматты уккандан кийин ишенбегенин айтышты. Мен Кудайдын алдында тазамын", - дейт спортчу.
Эске салсак, терезеден секирип омурткасын сындырып алган 19 жаштагы кыз 3-августта ага карата зордуктоо аракети жасалганы боюнча милицияга арыз жазган. Арызында У.Э. аттуу адам менен кафелердин биринде таанышып, андан кийин мейманканага барышканын, зордуктоого аракет кылганда терезеден секирип жибергенин көрсөткөн.
Айрым маалымат каражаттары кызды зордуктоого аракет кылган адам панкратион боюнча Евразиянын 2 жолку чемпиону Улан Эралиев экенин жазышууда.