Бүгүн, 5-октябрда жаш ырчы, бийчи Айдана Деканын туулган күнү. Ырчыны туулган күнү менен куттуктап байланышып, бүгүнкү күнүн кандай белгилей турганын сурадык.
"Сиздерге рахмат, жыл сайын туулган күнүмдү көңүлдөн сырт калтырбайсыздар. Бүгүн мен үчүн кош майрам, биринчиден, туулган күнүм болсо, экинчиден жаңы клип жараткам, ошонун бет ачары.
Клиптин бет ачарына көптөгөн досторум, чыгармачылыктагы эже-агайлар, устаттар айтор көп адамдар чакырылган. Буга чейин образдуу клиптерди тарттырып келгем. Тактап айтканда, өзүмдүн ырдагы түрдүү образдарыма маани берчүмүн. Бүгүн көрсөтүлө турган "Шекер экен" аттуу ырдын клиби сюжетти камтыйт. Андан күйөрмандар менин актёрдук чеберчилигимди да сынай алышат.
Клиптин бет ачары 3 саатка созулары пландалган. Андан кийин эң жакын адамдарым менен тар чөйрөдө туулган күнүмдү белгилейм. 22 жашка толдум, буюрса, бул жылы да чыгармачылыктын үстүндө кызуу эмгектенем деген ниетим бар", - дейт ырчы бийкеч.
Айдана Деканы туулган күнү менен алгачкылардан болуп ырчы Аваз Акимов куттуктаган. Андан соң ырчы мырза интернеттеги жеке баракчасына экөөнүн сүйүү мамилесинде экенин билдирген куттуктоосун жазып, сүрөтүн жүктөгөн. Бул боюнча ырчы бийкеч буларды айтты:
"Ооба, адегенде экөөбүз мамилебизди ачыкка чыгаруу боюнча макулдашып алдык. Буга чейин көп убакыт ага-карындаштай гана мамиледе болчубуз. Ал менден 6 жашка улуу. Убакыттын өтүшү менен анын мага, менин ага ишенимим өсүп, кыз-жигит катары сүйлөшө баштадык. Күйөрмандарыбызга эгер кыз-жигит катары сүйлөшүп калсак, биринчилерден болуп аларга билдирүүнү убадалаганбыз. Убадалагандай эле мамилебизди ачык билдирдик.
Аваз мени жигитим катары куттуктаганына жана күйөрмандарыбызга билдирүүсүнө каршы болгон жокмун.
Биринчилерден болуп Аваз, продюсерим Назира, Асан агай, ырчы Самара Каримова болуп келишип, мага күтүлбөгөн жерден сонун маанай тартуулашты".
Айдана Дека 1996-жылы 5-октябрда төрөлгөн. Мураталы Күрөңкеев атындагы музыкалык окуу жайынын эстрадалык вокал бөлүмүн аяктаган. Анын репертуарында "Кыздын сыры", "Жигитке, "Бийле", "Жыргап жаша", "Кыргызым" жана башка ырлар бар.
5-октябрга карата жылнаама.