Бишкек ЖЭБ боюнча изилдөөгө алган эксперттик кызматтын жетекчилери камакка алынды. Бул тууралуу Башкы прокуратуранын басма сөз кызматынан кабарлашты.
Маалыматка караганда, Бишкек жылуулук электр борборун модернизациялоодогу коррупциялык иштерди иликтөө үчүн соттук-курулуш-техникалык комплекстүү экспертиза дайындалган. Эксперттик топко ошол эксперттик кызматтын жетекчилиги таасир бергендиктен, эксперттик топ документтерди иликтебей туруп эле 25-июнда мыйзам бузуу менен туура эмес жыйынтык чыгарып коюшкан.
"Башкы прокуратура эксперттик кызматтын жетекчилерине карата "кызмат абалынан кыянаттык менен пайдалануу", "кызматтык жасалмалоо" беренелери менен кылмыш ишин козгоду. Натыйжада аталган кызматтын эки жетекчиси жана бир кызматкери камакка алынды. Тергөө УКМКга өткөрүп берилди, алар тергөө ишин жүргүзүүдө", - деп айтылат маалыматта.
Ошондой эле Башкы прокуратура мурдагы өкмөт башчы Сапар Исаковдун жактоочусу Нурбек Токтакуновдун "Башкы прокуратура менен УКМК эксперттик топтун ишине кийлигишип жатат" деген дооматын четке каккан.
Айта кетсек, 9-июлда жактоочу Нурбек Токтакунов ЖЭБди жаңылоодо коррупция боюнча козголгон кылмыш ишин иликтеген тергөөчүлөр аталган кызматтын кызматкерлерине басым көрсөтүлүп жатканын айтып чыккан. УКМК бул маалыматты четке каккан эле.
Эске салсак, Сапар Исаковго 29-май күнү "коррупция" беренеси менен айып тагылган. Бир нече жолу суракка чакырылгандан кийин ал 2 айга камакка алынган. Бишкектин Биринчи Май райондук соту Исаковдун баш коргоо чарасын өзгөртүп, УКМКнын СИЗОсуна тергөө бүткөнгө чейин камоо чечимин кабыл алган.