Мурдагы премьер-министр Сапар Исаковдун ишинин тергөө мөөнөтүн узартуу боюнча маселе каралмакчы. Соттук отурум баштала элек

Бүгүн, 1-октябрда Бишкектин Биринчи Май райондук соту мурдагы премьер-министр Сапар Исаковдун ишинин тергөө мөөнөтүн узартуу маселесин карайт. Соттук отурум кечки саат 17:00дөн кийинки убакытка белгиленген.

Учурда Исаковдун иши боюнча соттук отурум баштала элек. Биринчи Май райондук сотунун имаратынын алдында Исаковдун тарапташтары чогулууда. Ал эми жактоочу Нурбек Токтакуновдун айтымында, сот залына Сапар Исаков алып келиниши мүмкүн.

Буга чейин, 9-августта Бишкек шаардык соту Биринчи Май райондук сотунун Исаковду эки айга, тагыраагы, 5-октябрга чейин камакта калтыруу чечимин күчүндө калтырган. Буга нааразы болгон Исаковдун жактоочусу Нурбек Токтакунов шаардык соттун чечимин өзгөртүү максатында Жогорку Сотко кайрылган.

29-августта Жогорку Сот мурдагы премьер-министр Сапар Исаковду 5-октябрга чейин камакта калтыруу боюнча райондук соттун чечимин күчүндө калтырган.

26-апрелде Сапар Исаков Бишкек ЖЭБи боюнча козголгон кылмыш ишинин негизинде күбө катары УКМКда сурак берген. Ал "Бишкек ЖЭБи боюнча менин күнөөм бар деген сөздөр чындыкка дал келбейт" деп билдирген. 14-майда Сапар Исаков экинчи жолу суракка барган. Анда УКМКга кирип баратып "саясий куугунтук болуп жатат" деп айткан.

29-май күнү Исаковго "коррупция" беренеси менен айып тагылган. 5-июнда Сапар Исаков УКМКга бешинчи ирет суракка чакырылып, ошол күнү соттун чечими менен тергөө абагына камакка алынган.

Автор: Айсалкын Качкынбекова
Фото: Айсалкын Качкынбекова