Өлкө башчы Кыргыз мамлекетинин чет өлкөдөгү элчилери менен жолугушууда Кыргыз-Тажик чек арасындагы чыр боюнча үн каткан жок

Бүгүн, 14-мартта Бишкектеги "Ала-Арча" мамлекеттик резиденциясында президент Сооронбай Жээнбеков элчилер жана консулдар менен жолукту. Кеңешмеге 27 элчи жана 7 консул катышты.

Мамлекет башчы Жээнбеков өлкөнүн эл аралык деңгээлде кадыр-баркын бекемдеп, улуттук кызыкчылыктарды илгерилетүүдө мүмкүнчүлүктөрдү толук колдонуу зарыл экенин билдирди.

"Бул жалгыз Тышкы иштер министрлигинин гана эмес, бардык министрлик менен ведомстволордун да милдети. Ошондуктан кеңешмеге өкмөттүн бардык мүчөлөрү чакырылды. Германия, Швейцария, Франция, Венгрия жана Азербайжанга расмий иш сапарларым даярдалууда. Алар соода-экономикалык, маданий-гуманитардык жана башка кызматташуу чөйрөлөрүндөгү алакабызды бекемдей алган иш сапарлар болот деп күтүүдөмүн.

Париж менен Рим шаарларында жашап, иштеп жаткан мекендештерибиздин саны өсүп жаткандыгын эске алуу менен Тышкы иштер министрлигине бекитилген бюджеттин ченеминде аталган шаарларда дипломатиялык өкүлчүлүктөрдү ачуу маселесин караштырууну тапшырам", - деди Жээнбеков.

Кечээ, 13-мартта Кыргыз-Тажик чек арасындагы жаңжалдан улам 5-6 адамга таш тийип жаракат алышканы маалымдалган. Дагы бир адамга ок тийип, ага Баткен облустук ооруканасында операция жасалганы белгилүү болгон. Бул маселе боюнча бүгүн өлкө башчы Кыргыз мамлекетинин чет өлкөдөгү элчилери менен жолугушууда үн каткан жок.

Автор: Наргиза Өмүрбек кызы