УКМК: "ЖЭБди жаңылоодогу коррупцияга Алмазбек Атамбаевдин тиешеси бар" деген материалдар өзүнчө бөлүндү"

Бүгүн, 17-июнда экс-президент Алмазбек Атамбаевди кол тийбестиктен ажыратуу боюнча депутаттык комиссиянын отуруму өттү. Анда УКМКнын өкүлү Сагынбек Исамидин уулу Бишкек ЖЭБин жаңылоодогу коррупциялык иштер боюнча суроого жооп берди.

Анын айтымында, бул факты боюнча 319-берене "коррупция" белгилери менен экс-президенттин тиешеси бар деген материалдар атайын бөлүнүп, Кылмыштардын жана жоруктардын бирдиктүү реестрине катталып, тергөөнү уюштуруу үчүн бүгүнкү күндө Башкы прокуратурага жөнөтүлгөн.

Буга чейин депутаттык комиссия Алмазбек Атамбаевди бир нече оор кылмыштар боюнча айыптаган. Алардын катарында ЖЭБди жаңылоодогу коррупция болгон.

Окуянын чоо-жайына кайрылсак:

2018-жылы 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Кытайдан алган 386 миллион доллар менен жаңыланган ЖЭБге карата сын-пикирлер күчөгөн. Бул факт боюнча кылмыш иши козголуп, тергөөнүн жүрүшүндө бир топ жооптуу кызматкерлер кармалган. Кийин КСДП бул боюнча билдирүү таратып, өндүрүштүк кырсык Бишкек ЖЭБинин жаңыланган бөлүгүндө эмес, эски бөлүгүнөн чыкканын белгилеген. Анда: "1961-жылы пайдаланууга берилген ЖЭБди реконструкциялоо шаарды кыйроодон аман алып калды. Мына ошол кыйроонун алдын алгандар бүгүн камакта отурушат", - деп жазылган.

Андан кийин Жогорку Кеңеш ЖЭБдеги аварияга байланыштуу өкмөттүн 2017-2018-жылдардагы күз-кыш мезгилдерге даярдыгын "жетишерлик эмес" деп таап, күнөөлүүлөрдү жоопко тартуу боюнча токтомду караган.

Бишкек ЖЭБин жаңылоодо "коррупция" беренеси менен айыпталып жаткандар мурунку премьер-министрлер Жантөрө Сатыбалдиев, Сапар Исаков, депутат Осмонбек Артыкбаев, Улуттук энергохолдингдин мурунку директору Айбек Калиев, "Электр станциялары" ишканасынын мурунку жетекчиси Салайдин Авазов, "Электр станциялары" ишканасынын башчысынын мурдагы орун басары Жолдошбек Назаров, Бишкек жылуулук электр борборун модернизациялоону башкаруу боюнча топтун мурдагы аткаруучу директору Темирлан Бримкулов жана мурдагы каржы министри Ольга Лаврова.