ЖЭБ соту: Айбек Калиев: "Смета жок болсо, анда бизге айып койгон 110 миллион доллар кайдан чыкты?"

Бүгүн, 18-ноябрда Бишкектеги Свердлов райондук сотунда Бишкек ЖЭБин жаңылоодогу коррупция боюнча соттук отурум өтүүдө. Анда жабырлануучу тарап сурак берүүдө. Отурумдун башында мурдагы өкмөт башчы Сапар Исаков эксперт Геннадий Хафизовдун качан келерине кызыкты. Буга судья аталган эксперт Кыргыз өлкөсүнөн тышкары жүргөндүктөн, отурумга чакыруу мүмкүн болбой жатканын айтты.

Жабырлануучу тарап болгон "Электр станциялары" ишканасынын өкүлү: "2012-жылы Электр станциялары" менен "TBEA"нын ортосунда келишим түзүлгөн. Долбоорду ишке ашыруу үчүн кытай тарап Кыргыз өлкөсүндө өкүлчүлүк ачкан. Анын жетекчиси катары Мусажан Макелек шайланган. Келишимге ылайык, модернизациялоо долбоору биротоло бүтүрүүгө берилген. ЖЭБди жаңылоодо кытай тарап белгиленген наркты койгон. Келишим өкмөт, Жогорку Кеңештин алдынан өткөндөн кийин, 2014-жылы ишке аша баштаган", - деди ал.

Айыпталуучулар жабырлануучу тараптын айткандарынан алар берген суроолорго жооп ала албагандыгын белгиледи. "Улуттук энергетикалык холдингдин" мурдагы жетекчиси Айбек Калиев: "Биз жабырлануучу тарапка 2016-жылкы чыгымдардын баалары көрсөтүлгөн эсеп маалыматын сураганбыз. Ага кол коюлду беле?", - деген суроо берди. Буга жабырлануучу тараптын өкүлү: "Бул жылдагы жалпы чыгымдардын эсеп маалыматына кол коюлган эмес. Себеби анын жетекчиси Геннадий Хафизовду таба алган эмеспиз. Азыр бизде бул сметанын көчүрмөсү гана бар", - деди ал.

Мындан тышкары, жабырлануучу тарап болгон "Электр станциялары" келишимге ылайык, ошол жылдар үчүн бардык салыктардан бошотулганы айтылды. Буга карата Айбек Калиевдин: "Эгер "Электр станциялары" салыктардан бошотулса, эмнеге смета салыктарды эске алуу менен түзүлүп калган", - деген суроого жабырлануучу тараптын өкүлү жооп бере алган жок.

Ошондой эле Айбек Калиев 2013-жылы түзүлгөн расмий смета жок болсо, бизге айып коюлган 110 миллион доллар кайдан чыкты деген суроо берди. Буга жабырлануучу тарап: "тактайбыз" , - деп жооп берди.

Автор: Бактыгүл Султаналиева