Жактоочу: "Бүгүн, 23-мартта ЖЭБ иши боюнча чечим чыгат"

Бүгүн, 23-мартта Бишкек шаардык сотунда ЖЭБ иши боюнча жактоочулардын апелляциялык даттануулары боюнча соттук отурум өтүп жатат. Анда бардык айыпталуучулар акыркы сөздөрүн айтып бүтүшкөнүн SUPER.KG порталына жактоочу Замир Жоошев билдирди.

"Учурда ЖЭБ иши боюнча бардык процесстер соңуна чыкты. Судья Ирина Воронцова акыркы чечим чыгаруу үчүн кеңешме бөлмөсүнө кирип кетти", - дейт жактоочу.

2019-жылдын 6-декабрында Бишкектин Свердлов райондук соту коррупция боюнча айыпталып жаткандарга карата чечим чыгарган. Анда мурдагы өкмөт башчы Сапар Исаков менен "Улуттук энергетикалык холдинг" ишканасынын мурдагы башчысы Айбек Калиев "коррупция" беренеси менен күнөөлүү деп табылып, 15 жылга эркинен ажыратылган. Мурдагы өкмөт башчы Жантөрө Сатыбалдиев 7 жыл 6 айга соттолсо, депутат Осмонбек Артыкбаев менен мурунку финансы министри Ольга Лаврова айып пул төлөөгө милдеттендирилген.

"Электр станциялары" ишканасынын башчысынын мурдагы орун басары Жолдошбек Назаров жана Бишкек жылуулук электр борборун модернизациялоону башкаруу боюнча топтун мурдагы аткаруучу директору Темирлан Бримкуловдун жаза мөөнөтү өткөндүгүнө байланыштуу сот залынан бошотулган. Ал эми "Электр станциялары" ишканасынын мурдагы башчысы Салайдин Авазов "коррупция" беренеси менен күнөөлүү деп табылып, 11 жыл 3 айга эркинен ажыратылган.

Бишкек шаардык сотундагы ишке Ирина Воронцова төрагалык кылууда, ал эми соттук коллегияда Нурбек Эсеналиев жана Нурлан Кожомбердиев.

Автор: Бактыгүл Султаналиева