super.kg logo
  Саясат  

Сооронбай Жээнбеков Бишкек шаарынын мэри Азиз Суракматов менен онлайн кеңешме өткөрдү

 

Президент Сооронбай Жээнбеков бүгүн, 7-июлда Бишкек шаарынын мэри Азиз Суракматов менен онлайн кеңешме өткөрдү. Анда борбор калаадагы учурдагы эпидемиологиялык кырдаал жана аны турукташтыруу боюнча көрүлүп жаткан чаралар талкууланды. Бул тууралуу президенттик аппараттын маалымат кызматынан билдиришти.

Мэр Азиз Суракматов Бишкек шаарынын аймагында коронавирустун жайылышына каршы күрөшүүнүн алкагында жүргүзүлүп жаткан иштер жөнүндө маалымат берди. Бүгүнкү күндө Бишкек шаары боюнча коронавирус инфекциясын жуктуруп алганы 3 миң 434 адамдан лабораториялык жол менен тастыкталганын, республика боюнча ооругандардын жалпы санынын 42 пайызын түзөрүн билдирди.

Азиз Суракматов борбор калаада коронавирус инфекциясы менен ооругандар үчүн ар кайсы мекемелердин базасында кошумча орундар уюштурулгандыгын белгиледи.

Мындан сырткары борбор шаардын бардык райондорунда 4 күндүзгү стационар ачылды, 3 миңден ашуун жаран медициналык жардам жана консультация алышты. Саатына 220 адамга чейин тейлей ала турган дагы мындай 250 орундуу 5 стационар ачуунун үстүндө иштер жүрүп жатат.

Ошону менен бирге ооругандар көп болгон жерлерге дагы 5 кошумча күндүзгү стационар ачуу мүмкүнчүлүгү каралууда. Бишкек шаарынын мэринин маалыматы боюнча, "Тез жардам" унааларынын жетишсиздиги курч көйгөй бойдон калууда.

Президент Сооронбай Жээнбеков кырдаалга иштиктүү анализдин жоктугуна көңүл буруу менен борбордогу бардык медициналык мекемелердин абалын, анын ичинде адистердин резервин иликтөө зарылдыгын белгиледи.

Мамлекет башчысы бардык кайрылгандар өз маалында медициналык жардам менен камсыздалышы керектигин өзгөчө белгиледи. "Бул маселеде айрым адамдарга артыкчылык берилбей, медициналык кызмат баарына бирдей жеткиликтүү болушу керек", - деп баса белгиледи президент жана колдо болгон мүмкүнчүлүктөрдү рационалдуу пайдаланууга, күндүзгү стационарлардагы узун кезектерди азайтуу үчүн кошумча ресурстарды тартууга жана алардын ишинин натыйжалуулугун арттырууга чакырды.

Мамлекет башчысы ооруканаларды күзгү-кышкы эпидемиологиялык кырдаалга даярдоонун, врачтарды кошумча транспорттор менен камсыз кылууда жардам көрсөтүүнүн маанисин белгиледи.

Мэриянын "Тез жардам" унааларынын жетишсиздиги боюнча суроо-талабына карата Сооронбай Жээнбеков республикалык штабга маселе буга чейин өнүгүү боюнча эл аралык өнөктөштөрдүн линиясы аркылуу карап чыгуу сунушталгандыгын эске салды. Аталган маселе боюнча конкреттүү сунуштардын киргизилүүсү күтүлүүдө.

Мамлекет башчысы ошондой эле ишмердүүлүгүнө чектөө киргизилген тармактар боюнча көзөмөлдү күчөтүү зарылдыгын белгиледи. Мэрдин көңүлүн коомдук транспорттогу санитардык ченемдердин сакталбай жатканына бурду.

Сооронбай Жээнбеков өндүрүш ишканаларын колдоо, жарандык коом жана ишкердик чөйрөнүн өкүлдөрүнүн кайрылуулары боюнча тыгыз байланыштын өзгөчө маанилүүлүгүн баса белгиледи.



 
Урматтуу колдонуучу! Эгер сизде коомчулуктун көңүлүн буруп, талкууну талап кылган жаңылыгыӊыз болсо биз менен бөлүшүӊүз.


 Рубрикадагы соңку кабарлар 

Рейтинг: Рейтинг 1 
Талкуу жабык.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул кабарды окуду:

Кабарлардын саны:
148406;
 
Маалымат-маанайшат порталы
2006-2020 © SUPER.KG
Кыргыз Республикасы, Бишкек шаары,
Жибек Жолу проспектиси 381
SUPER.KG порталына жайгаштырылган материалдар жеке колдонууда гана уруксат.
Жалпыга таратуу SUPER.KG порталынын редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: