"Элдик кабардын" ноябрь айындагы жеңүүчүсү: "Өспүрүм бала азыр деле ошол жука кийими менен кайыр сурап жүрөт"

Тилекке каршы, укугу тебеленип, зордук-зомбулукка кабылып, кароосуз калып же жаштайынан турмуштун оор сыноолоруна туш болгон балдар аз эмес. Балдар - коомдун аярлуу катмары. Аларга кам көрүү улуулардын, мамлекеттин түздөн-түз милдети.

Бул сүрөт бир эле ушул өспүрүмдүн эмес, турмуштагы оор кырдаалга туш болгон жалпы балдардын абалын чагылдыргандай. Сүрөттү 13-ноябрь күнү SUPER.KG порталынын "Элдик кабар" рубрикасына окурман жөнөткөн. Анда ал: "Ош шаарындагы кафелердин биринин алдында 7-8 жаштагы өспүрүм бала түн ичинде саат 23:00дөр чамасында кайыр сурап отурат, ал жука кийимчен", - деп жазган. Кабар жарыялангандан кийин дароо окурмандардын талкуусун жараткан. Анда көпчүлүгү баланы аяп, ата-энесинин ким экендигине кызыгышкан.

Кийинчерээк SUPER.KG порталы бул боюнча Ош шаардык ички иштер башкармалыгына байланышып, түнкүсүн кайыр сурап отурган бала тууралуу маалымат алды. ШИИБдин билдирүүсүнө ылайык, ал лөлү тектүү үй-бүлөдөн жана лөлү тектүүлөр кайыр суроону кесип катары кабыл алып калышкан. Ошондой эле Ош шаарынын өзүндө эле мындай кайыр сураган балдар жүздөн ашык экендигин, бирок алардын документтери жок болгондугуна байланыштуу бул баланын аты-жөнүн тактоого мүмкүн болбогондугун кошумчалаган.

Бардык адамдарды балдарды коргоого чакырган кабардын автору "Элдик кабардын" ноябрь айындагы жеңүүчү деп табылды.

- Саламатсызбы? Сиз "Элдик кабардын" жеңүүчүсү деп табылдыңыз!

- Рахмат.

- Өзүңүздү тааныштырып өтсөңүз...

Менин аты-жөнүм - Максат Бегматаев, Ош шаарында жашап, иштейм. 25 жаштамын. SUPER.KG порталынын туруктуу окурманымын.

- Кабарды бизге кандай максат менен жөнөттүңүз эле?

- Ош шаарында кайыр сураган өспүрүмдөр абдан көп, аларды көргөн сайын зээним кейийт. Көпчүлүгү лөлү тектүү үй-бүлөлөрдүн балдары, бирок мен башка улут экен деп балдарды бөлгүм келбейт. Менин алардын ата-энелерине ачуум келет. Аталары балдарды баккысы келбесе, аялдары удаа-удаа эмнеге төрөйт? Балдарды ушинтип кордоо үчүнбү? Ошол күнү да кафеден чыгып келе жатып бул өспүрүмдү көрүп калдым, аны ошондой жука кийим менен ага чейин эле шаардын ар кайсы жеринен көрүп калчумун. Бир жолу сүйлөсөм башка тилде жооп берген, ошондуктан ал түнү да кепке тарткан жокмун. Бирок "Элдик кабарга" жөнөтүп аз да болсо коомчулуктун көңүлүн кыйналган балдарга бурдурууну көздөдүм.

- Рахмат. Сиз ал баланы андан кийин да көрүп калдыңызбы?

- Ооба, көрүп эле жүрөм, дагы деле ошол жука кийими менен жүрөт. Эгер ШИИБ таба албай жатса, мен жардам берем.

- Сиз жөнөткөн кабар коомдун талкуусун жаратат деп күттүңүз беле?

- Чынында бул тууралуу ойлонгон жокмун, бирок окурмандардын кайдыгер карабагандыгына сүйүндүм. Анткени балдарды баарыбыз коргошубуз керек. Мен ал кезде балага бир жолку жардам беришим мүмкүн эле же үйүнө жеткирип коймокмун, эгер анын үйү бар болсо. Бирок ал менен анын жашоосун өзгөртө алмак эмесмин. Эгер балдардын мындай абалына көз жумсак, аларды уурдап, өлтүрүп, зордуктап кетүү ыктымалдыгына да көз жумган болобуз.

"ЭЛДИК КАБАРдын" 2017-жылдагы жеңүүчүлөрү: