Бурулайдын өлүмү боюнча милиция кызматкерлеринин жоопкерчилигин караган соттук отурум 28-январда уланат

Бүгүн, 10-январда Бишкектин Аламүдүн райондук сотунда Жайыл райондук милиция бөлүмүндө бычакталып каза болгон Бурулай Турдали кызынын өлүмү боюнча милиция кызматкерлеринин жоопкерчилигин караган соттук отурум өттү.

Отурумда Жайыл РИИБинин нөөмөт бөлүмүнүн ага нөөмөткери И.Иманалиев жана Жайыл РИИБинин нөөмөт бөлүмүнүн имарат күзөт тобунун милиционери М.Макеев сурак беришти.

Кийинки соттук отурум 28-январь күнү саат 14:00дө уланмай болду.

Бурулайдын өлүмү боюнча 5 милиция кызматкерине 316-шалаакылык беренеси боюнча иш козголгон. Алар Жайыл РИИБинин нөөмөт бөлүмүнүн ага нөөмөткери И.Иманалиев, Жайыл РИИБинин нөөмөт бөлүмүнүн имарат күзөт тобунун милиционери М.Макеев, Чүй ОИИББи боюнча Жол коопсуздугун камсыз кылуу бөлүмүнүн 5-взводунун кенже тескөөчүлөрү З. Байтереков жана З.Айткожоев, Жайыл РИИБинин тергөөчүсү Э.Кадышевдер.

Окуянын чоо-жайы:

Ушул жылдын 27-май күнү Бишкек шаарында жигит кызды ала качып бара жаткандыгы боюнча милицияга маалымат түшкөн. Көп узабай жигит менен кыз бара жаткан унаа Сосновка айылындагы посттон токтотулуп, Жайыл райондук ички иштер бөлүмүнө жеткирилген.

Милиция бөлүмүндө жигит кызга, андан соң өзүнө бычак сайып, оор абалда экөө тең ооруканага жеткирилген. Кыз алган жаракатынан улам көз жумган.

Каза болгон кыз 20 жаштагы Бурулай Турдали кызы, ал эми жигит 29 жаштагы Марс Бөдөшов экендиги анык болгон. Бурулай Турдали кызы борбор шаардагы медициналык окуу жайлардын биринде окуй тургандыгын жана ушул жылдын август айында Марс Бөдөшовго эмес, башка жигитке турмушка чыгууга даярданып жатканын жакындары айтып беришкен.

Бул боюнча иш Бишкек шаарынын Свердлов райондук сотунда каралып, сот Марс Бөдөшовду 20 жылга, ала качууга айыпталган Акмат Сейитовду 7 жылга эркинен ажыраткан.

Автор: Бекболот Сарыбаев