Бишкекте жамгыр жаагандан кийин абанын булганышы нормадан ашкан жок

Бүгүн, 3-мартта борбор калаада жамгыр жааганына байланыштуу абанын булганышынын көрсөткүчү төмөндөдү. Саат 15:10го карата Бишкектин көпчүлүк районунда абанын булганышы нормадан ашкан жок. Мындай маалыматты "МувГрин" жаштар кыймылынын интернет баракчасынан көрүүгө болот.

Ага ылайык, Бишкектин 5 жерине абанын булганышын ченөөчү приборлор орнотулган. Приборлордогу маалыматтарды Эйрказ.орг сайтынан онлайн түрүндө көрүп турууга мүмкүн.

Көк-Жар кичи районунда учурдагы көрсөткүч - 16 микрограмм (сутка ичиндеги орточо көрсөткүч - 58). Дүйнөлүк саламаттыкты сактоо уюмунда сутка ичинде орточо эсеп менен куб метрге 25 микрограмм болгон көрсөткүч норма катары саналат.

Ак-Өргөө конушу - 14 микрограмм (сутка ичиндеги орточо көрсөткүч - 63).

Чыгыш-5 кичи району - 11 микрограмм (сутка ичиндеги орточо көрсөткүч - 34).

7-кичи район - 6 микрограмм (сутка ичиндеги орточо көрсөткүч - 36).

Бейшеналиева-Токтогул көчөлөрүнүн кесилиши - 12 микрограмм (сутка ичиндеги орточо көрсөткүч - 54).

"МувГрин" жаштар кыймылынын мындай маалыматтарын Курчап турган чөйрөнү коргоо жана токой чарба агенттиги четке кагып келет. Агенттиктин директору Абдыкалык Рустамовдун айтымында, ар бир жыйынтык жүргүзүлгөн талдоолордун негизинде гана чыгарылып, Гидрометеорология агенттиги тарабынан расмий маалымат берилет.

Автор: Айпери Ганыжан кызы