Алмазбек Атамбаевди кол тийбестиктен ажыратуу: Башкы прокуратуранын корутундусу чыкты

Экс-президент Алмазбек Атамбаевди кол тийбестигинен ажыратуу боюнча Башкы прокуратуранын корутундусу даяр болду. Бул тууралуу бүгүн, 25-июнда Жогорку Кеңештин тиешелүү комитетинин отурумунда депутат Талант Мамытов билдирди.

Анын айтымында, корутунду депутаттык комиссияга келип түштү. Ал аталган комитеттен корутундуну бүгүн кароону суранды.

Белгилүү болгондой, депутаттык комиссиянын чечими Башкы прокуратурага 20-июнда түшкөн.

Буга чейин аталган депутаттык комиссиянын төрагасы Каныбек Иманалиев Кыргыз Республикасынын экс-президентинин макамынан ажыратуу үчүн 8 тосмодон өтүү керектигин айткан.

40тан кем эмес депутаттын экс-президентти кол тийбестиктен ажыратуу боюнча кайрылуусу;
Тиешелүү парламенттик комитетте бул кайрылууну кароо жана депутаттык комиссияны түзүү боюнча чечими;
Депутаттык комиссиянын экс-президентти айыптоого негиздерди издеп топтоо иши;
Жогорку Кеңештин Укук тартиби, кылмыштуулук менен күрөшүү жана коррупцияга каршы аракеттенүү боюнча комитетинде кароо;
Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитетинде кароо;
Жогорку Кеңеште депутаттык комиссиянын чечимин кароо жана Башкы прокуратурага материалдарды жөнөтүү (40тан кем эмес депутаттын макулдугу керек);
Башкы прокуратуранын корутундусу;
Жогорку Кеңеште добуш берүү (80ден кем эмес депутаттын макулдугу керек).

Алгач Атамбаевге 9 оор кылмыш боюнча айып тагылган. Кийин алардын саны 6га кыскартылган. Алар:

Бийликти узурпациялап, массалык маалымат каражаттарына, депутаттарга, коомдук ишмерлерге кысым жасоо жана миллиондогон сомдук доолорго жыгуу;
Кримтөбөл Азиз Батукаевди мыйзамсыз бошотууну уюштуруу;
Кой-Таш айылында Атамбаев турак жай салган жер тилкени мыйзамсыз сатып алуу;
Акча адалдаган "Ака Петролеум" жана "АКА Инвест" компаниялар менен Атамбаевдин тиешеси болушу мүмкүндүгү;
Бишкек Жылуулук электр борборун жаңылоодогу коррупция боюнча;
ЖЭБге көмүрдү мыйзамсыз ташып келген компания менен Атамбаевдин байланыштыгы боюнча.