Жогорку Кеңештин депутаты Осмонбек Артыкбаев камакка алынды. Бул тууралуу УКМКнын маалымат кызматынан кабарлашты. Маалым болгондой, Артыкбаев өзүнө карата козголгон кылмыш иштин негизинде кармалып, тергөө аягына чыкканга чейин УКМКнын тергөө абагында болот.
"5-июнда башкы прокурор парламенттин депутаты Осмонбек Артыкбаевге карата "Бишкек ЖЭБди модернизациялоо" долбоорун ишке ашыруудагы коррупция боюнча Кылмыш-жаза кодексинин 303-беренесинин 1-бөлүмүндө (коррупция) каралган кылмыш белгилерине ылайык кылмыш ишин козгоду. Анын алкагында Артыкбаев кылмышка шектүү адам катары УКМКнын убактылуу кармоочу жайынын тергөө камак жайына киргизилди. Тергөө уланууда", - деп айтылат маалыматта.