Укук коргоочу: "Экс-мэр Кубанычбек Кулматовдун ишинде арты таза эмес соттор, тергөөчүлөр курал катары колдонулууда"

"Экс-мэр Кубанычбек Кулматовдун ишинде арты таза эмес соттор, тергөөчүлөр курал катары колдонулууда" деп бүгүн, 8-октябрда өткөн маалымат жыйында анын жарандык коргоочусу Токтайым Үмөталиева айтты.

"Кубанычбек Кулматовдун ишинде арты таза эмес соттор, тергөөчүлөр курал катары колдонулуп жатат. Ал жарандыгын тапшыруу боюнча өзү арыз берген эмес. Соттун чечими жок. Кулматовдун маселесине президент өзү көңүл бурбаса, маселе татаалдашат. Эртең башка да адамдар ушундай жол менен камала бериши мүмкүн. Аны кыргыздын жараны эмес деп жатышат. Андай болсо расмий, так документтер менен далилдешсин", - деди ал.

Буга чейин Улуттук коопсуздук комитети Бишкектин экс-мэри Кубанычбек Кулматов Кыргыз Республикасынын жарандыгын мыйзамсыз алган деп тапкан. УКМКнын пикири боюнча, Кулматов 1995-жылы СССРдин жараны деген паспортун жоготуп жиберип, Орусия Федерациясынын паспортун алган. "1996-жылдын 26-ноябрында СССР жараны делген паспорту менен Бишкек шаарындагы Биринчи Май районунан мыйзамсыз Кыргыз Республикасынын жараны деген паспорт алган. Кийин ал паспортторун 2001, 2003 жана 2013-жылы жаңылаган", - деп билдирген УКМК.

Ал эми жактоочу Сергей Слесарев Кулматовго "Орусиянын жараны болуп туруп 1990-жылдары Кыргыз жарандыгын алган" деп иш козгоо туура эмес деп пикирин айткан. "Эгер ал чын эле ушундай кылган болсо, мыйзамда көрсөтүлгөн кылмыштын мөөнөтү өтүп кеткен, Кулматовго тагылган берененин мөөнөтү 1 жылдан 3 жылга чейин гана. Ал эми учурда ортодон 20 жылга жакын убакыт өтсө дагы иш мыйзамга карабай козголууда", - деген Слесарев.

Тектеш кабарлар:
РУБРИКАДАГЫ СОҢКУ КАБАРЛАР
Архив
Комментарийлер (0)
БАШКЫ БЕТ
СОҢКУ КАБАР
СУПЕР-ИНФО
SUPER.KG ВИДЕО
МЕДИА-ПОРТАЛ
Кинозал
ЖЫЛНААМА
Суперстан