Бишкектин Ак-Өргөө конушунда жана Көк-Жар кичи районунда абанын булганышы нормасынан дээрлик 4 эсе жогору

Бүгүн, 14-мартта 8:00гө карата Бишкектин Ак-Өргөө конушунда жана Көк-Жар кичи районунда абанын булганышы нормасынан дээрлик 4 эсе жогору. Мындай маалыматты "МувГрин" жаштар кыймылынын интернет баракчасынан көрүүгө болот.

Ага ылайык, Бишкектин бир нече жерине абанын булганышын ченөөчү приборлор орнотулган. Приборлордогу маалыматтарды Эйрказ.орг сайтынан онлайн түрүндө көрүп турууга мүмкүн.

Ак-Өргөө конушунда учурдагы көрсөткүч - 84 микрограмм (сутка ичиндеги орточо көрсөткүч - 94). Бул нормага ылайык көрсөткүчтөн 3,34 эсеге жогору. Дүйнөлүк саламаттыкты сактоо уюмунда орточо эсеп менен куб метрге 25 микрограмм болгон көрсөткүч норма катары саналат.

Чыгыш-5 кичи району - 51 микрограмм (сутка ичиндеги орточо көрсөткүч - 45).

Көк-Жар кичи району - 82 микрограмм (сутка ичиндеги орточо көрсөткүч - 38).

Бейшеналиева-Токтогул көчөлөрүнүн кесилиши - 71 микрограмм (сутка ичиндеги орточо көрсөткүч - 60).

7-кичи район - 41 микрограмм (сутка ичиндеги орточо көрсөткүч - 32).

"МувГрин" жаштар кыймылынын мындай маалыматтарын Курчап турган чөйрөнү коргоо жана токой чарба агенттиги четке кагып келет. Агенттиктин директору Абдыкалык Рустамовдун айтымында, ар бир жыйынтык жүргүзүлгөн талдоолордун негизинде гана чыгарылып, Гидрометеорология агенттиги тарабынан расмий маалымат берилет.

Автор: Бекболот Сарыбаев