"Убактылуу кармоочу жай курорт эмес". ИИМ Шамиль Атахановдун даттануусуна жооп берди

Кыйноолорго каршы күрөш боюнча улуттук борбор убактылуу кармоочу жайда мурдагы вице-премьер-министр Шамиль Атахановго убагында дары-дармектер берилген эмес деп маалымат тараткан.

Маалыматта жазылгандай, Шамиль Атаханов мурда 2 жолу инфаркт алгандыктан алдын ала дарыгерлердин көзөмөлүнөн өтүп алууга кызматкерлер уруксат берген эмес.

"Атахановдун жактоочусун ал чакырткан убакта киргизбей коюшкан. Ошондой эле анын кийимдери жана дары-дармектери бүгүн эртең менен гана кирген. Ал эми эртең Биринчи Май райондук сотунда Атахановдун баш коргоо чарасы каралат", - деп билдирди аталган борбор.

Ал эми бул маалыматка карата Бишкек ШИИББинин басма сөз кызматы төмөнкүчө жооп берди.

"Шамиль Атаханов башка жарандар менен бирдей укукта жана шартта камалууда. Эгер анын денесинде көк ала тактар убактылуу кармоочу жайга киргенге чейин болгон болсо гана өткөрүлөт. Тилекке каршы, убактылуу кармоочу жай курорт эмес.

Нөөмөттөгү кызматкерлер кармалып турган жарандардын ден соолугун сурап турушат. Эгер жарандардын оорусу күчөп баштаса же катуу ооруп калса "Тез жардам" кызматы чакыртылат. Ал эми жактоочусун ал чакырткан убакта кирбей калды деген туура эмес маалымат. Биз жактоочуга эртең мененки саат 06:00дөн кечки саат 22:00гө чейин кирип жолугууга уруксат бергенбиз. Ал эми төшөнчүлөр убагында берилген жок деген маалымат чындыкка дал келбейт", - деп жазылат маалыматта.

Шамиль Атаханов кечээ, 21-майда камакка алынган.

16-майда Батукаевди мыйзамсыз бошотуу боюнча мурдагы саламаттыкты сактоо министри Динара Сагинбаева менен Жазаларды аткаруу мамлекеттик кызматынын төрагасынын мурдагы кеңешчиси Калыбек Качкыналиев СИЗО-1ге киргизилген. Ага чейин Батукаевдин иши боюнча дарыгер Эмил Макимбетов жана лаборант Ирина Цопова камакка алынган. Андан кийин дагы 3 дарыгердин бул иш боюнча баш коргоо чарасы каралып, тергөө абагына киргизилген.