Дүйшөнбек Зилалиев отставкага кетти (өмүр баяны)

Мамлекеттик мүлктү башкаруу фондунун төрагасы Дүйшөнбек Зилалиев отставкага кетти. Бул тууралуу аталган мекеменин басма сөз кызматы билдирди.

"Жакында мен бомба тууралуу түшүнүксүз кылмыш ишинин фигуранты болуп калдым. Мындан улам жалпыга маалымдоо каражаттарында мага каршы сөздөр айтыла баштады. Бул окуя менин намысыма шек келтирди жана өкмөт менен премьер-министрге көлөкө түшүрдү. Ошондуктан, бул кылмыш иши боюнча тергөө аяктаганга чейин отставкага кетүүм эң туура чечим деп эсептейм", - деп түшүндүрдү Зилалиев.

Белгилүү болгондой, буга чейин "Дело №" гезити президент Сооронбай Жээнбеков ант берип жаткан күнү "өкмөттүк жолго жардыруучу зат коюлган" деген жалган маалымат тууралуу жазган. Кийинчерээк бул маалыматты айткан Зилалиев экени белгилүү болуп, бул факт боюнча кылмыш иши козголгон.

Зилалиев Дүйшөнбек Текшербекович

1973-жылдын 16-июлунда Жалал-Абад облусуна караштуу Кара-Көл шаарында туулган. Билген тилдери: кыргыз, орус, түрк жана англис тилдери.

1991-жылы СССР Ички иштер министрлигинин Караганда жогорку мектебин, 1991-1992-жылдары Бишкектеги ИИМ жогорку мектебин бүтүргөн.

1995-жылы - Түркиянын Анкара ИИМ академиясын “юрист” боюнча адистигин бүтүргөн. Юридикалык илимдердин кандидаты.

Кесиптик тажрыйбасы:

1990-1991-жылдары – Электрик, ААК “НГЭС” өнөр жай жана жарандык курулуш куруу башкармалыгы, Кара-Көл шаары;

1995-1996-жылдары – Октябрь районунун ИИБ тергөө бөлүмүнүн тергөөчүсү;

1996-1999-жылдары – Адъюнкт, Орусиянын ИИМ Академиясынын адъюнктурасы, Москва шаары;

1999-2000-жылдары – Кыргыз Республикасынын ИИМ академиясынын окутуучусу, Бишкек шаары;

2000-жылдын августу – ИИМ академиясынын илимий-катчысы, Бишкек шаары;

2002-2003-жылдары – Мамлекеттик мүлктү башкаруу боюнча комитетинин инвестиция тартуу боюнча көзөмөл башчысы;

2003-2004-жылдары – Мамлекеттик мүлктү башкаруу боюнча мамлекеттик комитеттин Ош-Жалал-Абад-Баткен аймактык башкармалыгынын башчысы;

2004-жылдын март-декабрь айлары – Мамлекеттик мүлктү башкаруу комитетинин аппаратынын Бишкек шаары боюнча башчысы;

2005-жылдын январь-июнь айлары – Каракол шаарындагы 22-шайлоо округу боюнча Жогорку Кеңештин депутаттыгына талапкер;

2005-2009-жылдары – Президенттик аппараттын коргоо жана коопсуздук иштери боюнча уюштуруу жана мамлекеттик башкаруу саясаты бөлүмүнүн эксперти;

2009-2010-жылдары – Коопсуздук жана укук коргоо маселелери боюнча президенттин мамлекеттик кеңешмесинин инспектору;

2010-жылдын апрель-декабрь айлары - Мамлекеттик мүлктү башкаруу комитетинде аппарат башчы;

2011-2013-жылдары – Коргоо кеңешинин катчысынын орун басары;

2013-2016-жылдары – Өкмөткө караштуу геология жана минералдык ресурстар мамлекеттик агенттигинин директору;

2016-2017-жылдары Өнөр жай, энергетика жана жер казынасын пайдалануу мамлекеттик комитетинин төрагасы;

2017-жылдын август-ноябрь айлары вице-премьер-министр.

2017-жылдын 23-ноябрында Мамлекеттик мүлктү башкаруу фондунун төрагасы болуп дайындалган.

Мамлекеттик кызмат боюнча 3-класстагы мамлекеттик кеңешчиси.